Соңғы мәліметтерге сәйкес, өңірде 246 адамнан вирус анықталып, 65 адам қайтыс болған. Аурудың негізгі ошақтары – халық жиі қоныс аударатын Монгвалу мен Рвампара алтын өндіру аудандары. Бұл жағдай инфекциямен күресті қиындатып отыр.
Киншасадағы Ұлттық биомедициналық зерттеулер институтының алдын ала зерттеулері тексерілген 20 үлгінің 13-інен вирус барын растады. Ғалымдардың айтуынша, бұл қосымша зертханалық талдауды қажет ететін ерекше штамм болуы мүмкін.
Індеттің ірі елді мекендерге қарай таралуы ерекше алаңдаушылық туғызуда. Ауруға күдікті жағдайлар Итуридің әкімшілік орталығы Буниа қаласында да анықталған. Дәрігерлер халықтың белсенді қозғалысы вирустың Уганда мен Оңтүстік Судан сияқты көрші елдерге таралуына себеп болуы мүмкін деп қауіптенеді.
Провинциядағы тұрақсыз жағдай да қиындық туғызуда. Итури 2021 жылдан бері қарулы топтардың белсенділігіне байланысты әскери басқару режимінде тұр.
Бүгін Африканың ауруларды бақылау және алдын алу орталығы, Дүниежүзілік денсаулық сақтау ұйымы және халықаралық серіктестер шұғыл жиын өткізді. Кездесудің басты тақырыбы – шекаралық бақылауды күшейту, медицина қызметкерлерінің іс-қимылын үйлестіру және қажетті дәрі-дәрмек қорын дайындау болды.
Эбола безгегі алғаш рет 1976 жылы қазіргі Конго Демократиялық Республикасының аумағында анықталған. Вирус жұқтырған адамдардың немесе жануарлардың биологиялық сұйықтықтарымен тікелей байланыс арқылы таралады және өлім көрсеткіші өте жоғары.
Аурудың алғашқы белгілері ауыр тұмауға ұқсайды: дене қызуының көтерілуі, әлсіздік, бас және бұлшықет ауруы байқалады. Кейін дерт асқынып, ішкі қан кету мен ағзалардың зақымдануына әкелуі мүмкін.
Эболаның ең ірі індеттерінің бірі 2014 жылы Батыс Африкада тіркеліп, 11 мыңнан астам адамның өмірін қиған еді.
