Алматы тұрғыны 14 ақпанда гүл жеткізген курьер тарапынан әдепсіз әрекетке ұшырағанын мәлімдеді. Қыздың айтуынша, курьер кешкі сегіз шамасында келген, ол есікті ашып, гүлді бұрышқа қоюын өтінген.
«Ол үйге екі қадам ғана кірді. Сол сәтте маған қатысты сексуалдық сипаттағы әрекет жасады. Барлығы бірнеше секундта болды», — дейді ол.
Оқиғадан кейін қыз курьерге полицияға шағымданатынын жазған. Алғашында ер адам дөрекі жауап беріп, кейін хабарласып, жағдайды «түсінбеушілік» деп ақталуға тырысқан.
Қалалық полиция департаменті курьердің жеке басы анықталып, Бостандық ауданы полиция басқармасына жеткізілгенін хабарлады. Іс материалдары сотқа жолданып, оның әрекетіне құқықтық баға берілмек.
Бастапқыда қыз әлеуметтік желіде курьерді «Яндекс» қызметкері деп жазған, кейін жеткізуді InDrive курьері жасағанын нақтылады.
