Құжат қазір Парламент Мәжілісінің қарауында. Заң жобасына сәйкес, шектеу тек сабақ уақытында ғана емес, үзіліс кезінде де қолданылуы мүмкін. «Педагог мәртебесі және білім беру мәселелері бойынша ҚР кейбір заңнамалық актілеріне өзгерістер мен толықтырулар енгізу туралы» заң жобасын төменгі палата депутаттары ұсынған.
Құжат мәтінінде оқу процесі кезінде орта білім беру ұйымдарында оқушылардың ұялы байланыс құрылғыларын пайдалануына жол берілмейтіні көрсетілген. Тек білім беру саласындағы уәкілетті орган бекіткен арнайы ережелерде қарастырылған жағдайлар ғана ерекшелік болуы мүмкін.
Жаңашылдық үзіліс уақытында да телефон қолдануды шектеуді көздейді. Құжат авторларының пікірінше, бұл кибербуллинг пен зиянды контент тәуекелдерін азайтып, мектептегі тәртіп пен қауіпсіздікті күшейтеді. Сонымен қатар, оқушылар арасындағы тікелей қарым-қатынасты арттырып, әлеуметтену деңгейін көтеруге және салауатты білім беру ортасын қалыптастыруға ықпал етеді.
