Тергеу дерегінше, 33 жастағы ер адам үйінде екі кішкентай баласымен және жиенімен бірге отырған. Сол сәтте ол сегіз жастағы жиенін өзінің төрт жастағы қызына зорлық жасап жатыр деп күдіктенген (немесе соған ұқсас әрекет көрдім деп ойлаған).
Осыдан кейін ер адам баланы аса қатыгездікпен ұрған. Нәтижесінде жәбірленушінің саусақтары сынған, миы шайқалған, бірінші дәрежелі күйік, бүкіл денесінде көгерулер мен қанталаулар анықталған.
Баланың анасы, Алматы қаласының тұрғыны, ұлын атасының өтінішімен Балқашқа бір жарым айға жібергенін айтты. Баланың әкесі – оның бұрынғы күйеуі – қазіргі таңда түзеу мекемесінде жазасын өтеп жатыр. Ал оқиға болған күні атасы жұмыста болған.
Медициналық сараптама мен мамандар 8 жастағы баланың физиологиялық тұрғыдан мұндай қылмыс жасауы мүмкін емес екенін растаған. Ал анасының айтуынша, соққыдан кейін бала ауыр психологиялық жарақат алған.
«Түнде қорқынышты түстер көреді, ұйқы кезінде зәрін ұстай алмай қалады. Үнемі есіктерді ішінен жауып алады. Есік қағылса, полициядан қатты қорқады. Мектепте құрдастарымен араласа алмайды, қыз балалармен сөйлесуден қашады. Өте тұйық, жиі себепсіз жылайды. Ең қорқыныштысы — ол оны не үшін ұрғанын түсінбеді. Кей сәттерде есінен танып қалғанын, кейбір жағдайларды мүлде есіне түсіре алмайтынын айтты», — деді анасы сот отырысының алдында.
Әйелдің сөзінше, 2 тамыз күні полиция баланы психологсыз бірнеше сағат бойы тергеген, бұл оның жағдайын одан әрі ушықтырған. Алғашында іс зорлау бабы бойынша тіркелген, алайда кейін бұл бап бойынша іс жабылған.
Сот отырысына журналистер келгеннен кейін айыпталушы, оның адвокаты және прокурор істі жабық режимде қарауды талап еткен.
«Интимдік сипаттағы мәліметтер жарияланбауы үшін», — деп уәж келтірілді.
Сот бұл өтінішті қанағаттандырып, журналистер залдан шығарылды. Айыпталушы тарап пікір беруден бас тартты.
Баланың анасы ұзақ ем мен дәрігерлерге сабылу салдарынан жұмысынан айырылғанын, әрі қарай психологиялық көмек көрсетуге шамасы жетпей, несие алуға мәжбүр болғанын айтты.
Айта кетейік, ер адамға кәмелетке толмаған баланың денсаулығына орташа ауыр зиян келтірді деген айып тағылған.
