Ведомствоның мәліметінше, аталған дерек бойынша бір қылмыстық іс қозғалған. Алайда іс диверсия немесе терроризм баптары бойынша емес, Қылмыстық кодекстің 174-бабы — әлеуметтік, ұлттық немесе өзге де алауыздықты қоздыру бойынша тіркелген.
Нақтырақ айтқанда, 2025 жылғы 17 желтоқсанда Астана қаласының полиция департаменті КТК нысанының бүлінуіне байланысты азаматтардың жағымсыз әрі арандатушылық пікірлеріне қатысты сотқа дейінгі тергеп-тексеруді бастаған.
Тергеу барысында жарияланым авторларын анықтау, олардың ықтимал кінәсін дәлелдейтін материалдарды жинау шаралары жүргізіліп жатыр. Іс нәтижесі бойынша әрекеттерге түпкілікті құқықтық баға беріліп, тиісті процессуалдық шешім қабылданады.
Айта кетейік, бұған дейін Бас прокуратура жалған ақпарат пен заңға қайшы контент таратудың жол берілмейтіні жөнінде ескертіп, мұндай әрекеттер үшін қылмыстық және әкімшілік жауапкершілік қарастырылғанын мәлімдеген болатын.
