Әншінің айтуынша, 26 желтоқсанда дүниеге ұл сәби келген.
«26 желтоқсанда шекесі торсықтай ұлым өмірге келді. Аллаға шүкір, сабырмен күткенге берілетін сый да ерекше екен. Бұл бала – өміріме келген үлкен аманат, маңдайыма жазылған ең тәтті бақ», – деп жазды ол.
Айша Байбосынова баласының кіндік әке-шешесі ретінде Тұрсын және Баян Алагөзовтерді таңдағанын айтты. Сондай-ақ сәбиіне Тұрсынғали есімі берілгенін жеткізді.
«Балапанымның кіндік әке-шешесі – өмір мен өнер жолында әрдайым жанымыздан табылған, отбасылық жақын достарымыз Тұрсын мен Баян. Сәбиімізге азан шақырып Тұрсынғали деген есім қойдық. Бұл – тағдыр тоғыстырған сыйлы жандарға деген құрметіміздің, жылдармен бекіген достық пен сенімнің белгісі», – деп жазды әнші.
Өнер иесі ұлына ақжарма тілегін арнап, оның жомарт, мейірімді, елге сыйлы азамат болып өсуін тілеген.
