Абай облысында Бестерек ауылында болған, төрт баланың қаза табуына әкеп соққан жол-көлік оқиғасы бойынша сот процесі аяқталды. Сот 55 жастағы жүргізушіні кінәлі деп таныды.
Ер адам жол қозғалысы ережелерін бұзып, абайсызда екі немесе одан да көп адамның өліміне себепкер болғаны үшін сотталды. Оған ең төменгі қауіпсіздік деңгейіндегі колонияда 9 жыл бас бостандығынан айыру жазасы тағайындалып, 7 жылға көлік құралын басқару құқығынан айырылды.
Қайғылы оқиға 2025 жылдың 19 тамызында болған. Toyota маркалы автокөлік жүргізіп келе жатқан ер адамның кенеттен эпилепсия ұстамасы ұстап, ол рөлге ие бола алмай қалған. Соның салдарынан тұрғын үй ауласында ойнап жүрген балаларды қағып кеткен.
Екі бала оқиға орнында қаза тапса, тағы бірі ауруханаға бара жатқан жолда көз жұмған. Кейінірек медициналық мекемеде тағы бір қыз бала қайтыс болды. Тағы екі бала жарақат алып, тірі қалған.
