Трамптың шағымына BBC материалында оның сөзінен үзінділердің әдейі бұрмаланып берілуі себеп болған. Президенттің айтуынша, мұндай монтаж қоғамда оның жақтастарын Капитолийді басып алуға шақырды деген жалған әсер қалдырған.
Агенттік мәліметінше, мемлекет басшысы өзі «жалған әрі әділетсіз» деп санайтын медиаматериалдарға қарсы күресте «халықаралық майдан ашқан».
Даулы эпизод BBC-дің Panorama бағдарламасында көрсетілген. Трамп бұл шығарылымда өз бейнесі «жалған, жалаға құрылған, адастыратын, абыройға нұқсан келтіретін, арандатушылық және қасақана берілген» деп санайды. Бағдарлама 2024 жылғы президент сайлауына бір апта қалғанда эфирге шыққандықтан, ол мұны сайлау процесіне ықпал ету әрекеті деп бағалап отыр.
Дональд Трамп BBC-ге осындай көлемде талап қою ниетін бұған дейін де жариялаған. Медиакомпания оған арнайы хат жолдап, кешірім сұрағанымен, қаржылай өтемақы төлеуден бас тартатынын ескерткен.
