Жаңа нормаға сәйкес, қозғалтқышы қосулы тұрған механикалық көлік құралын әкімдіктер белгілеген уақыттан артық қоюға тыйым салынады. Бұл талап әр өңірдің ерекшелігіне қарай жеке айқындалады: облыстарға, республикалық маңызы бар қалаларға және елордаға арналған уақыт шектеуі бөлек бекітіледі.
Аталған шектеу электромобильдерге, сондай-ақ жедел және арнайы қызметтерге тиесілі көлік құралдарына қолданылмайды.
Осылайша, Астана, Алматы, Шымкент қалалары мен өңірлердің әкімдіктері автокөлікті қанша минут қыздыруға болатынын жергілікті климаттық және өзге де жағдайларды ескере отырып, өздері белгілейтін болады.
Мәжілістің ресми сайтында хабарланғандай, заң жобасы депутаттардың бастамасымен әзірленіп, мақұлданғаннан кейін Сенаттың қарауына жолданды.
