Кей жағдайларда мұндай пікірталастар адамдардың бір-бірімен сөзге келуіне де себеп болып отыр. Осыған байланысты имам Нұрлан Асанов аталған тақырыпқа қатысты өз көзқарасын білдірді.
Имамның айтуынша, ислам дінінде Жаңа жыл, Наурыз, Конституция күні немесе Республика күні сияқты мемлекеттік мерекелер арнайы діни мейрам ретінде бекітілмеген. Алайда «дінде жоқ» деген себеппен мұндай күндерді толықтай жоққа шығарып, қоғамнан аластату дұрыс емес.
Нұрлан Асановтың пікірінше, мұндай ұстаным қоғамның бөлінуіне алып келіп, ұлттық бірлікке кері әсер етуі мүмкін.
«Біз зайырлы мемлекетте өмір сүріп жатырмыз. Әр зайырлы елдің өзіне тән мерекелері болады. Сондықтан әр нәрсе өз орны, өз ретімен болғаны жөн», – деді ол.
Сонымен қатар имам адамдарды бір-бірін «кәпір», «дінсіз» деп айыптаудан аулақ болуға шақырып, сабыр мен өзара түсіністіктің маңызын атап өтті.
