Қалалық Полиция департаментінің мәліметінше, оқиға Бөгенбай батыр даңғылының бойында болған. Көлікті 40 жастағы қала тұрғыны тізгіндеген. Ол көлік тиесілі компанияда жұмыс істейді және автокөлікті қызметтік мақсатта жүргізіп жүрген.
— Тексеру барысында ер адамның жол ережесін үнемі бұзып келгені анықталды. Алайда айыппұлдарын төлеуден жалтарған, – делінген департамент таратқан хабарламада.
Қазіргі таңда көлік арнайы айыптұраққа жеткізілді, ал жүргізушіге қатысты атқарушылық іс қозғалды. Материалдар сот орындаушыларына жолданып, енді олар қарызды заң аясында өндірумен айналысады.
Айта кетейік, бұған дейін Ақтөбеде полицейлер екі айдың ішінде 131 рет жол ережесін бұзған шетелдік нөмірлі көлік жүргізушісін ұстаған еді. Оның айыппұлдарының жалпы сомасы – 3,5 миллион теңге. Бұл көлік те айыптұраққа қойылған болатын.