«Елімізде ауыр және аса ауыр қылмыстар саны азайды, соның ішінде кісі өлтіру, денсаулыққа ауыр зиян келтіру, ұрлық, мал ұрлығы, алаяқтық, тонау және қарақшылық қылмыстар санының төмендеуі байқалады», – деді министр.
Сонымен қатар, кәмелетке толмағандар жасаған қылмыстар, қоғамдық орындарда және қару қолдану арқылы жасалған қылмыстар да азайған. Министр Ержан Саденовтың айтуынша, бұл нәтижелерге азаматтардың қауіпсіздігін қамтамасыз етуге бағытталған заңнамалық бастамаларды күшейту және заманауи цифрлық шешімдерді белсенді қолдану арқылы қол жеткізілген. Сондай-ақ, тергеудің жаңа әдістерін енгізу арқылы барлық санаттағы қылмыстардың ашылуы жақсарды.
2024 жылы министрлік құрылымында есірткі қылмысына қарсы іс-қимыл комитеті құрылды. Соның нәтижесінде 12 ай ішінде 7920 есірткіге қатысты құқық бұзушылық анықталып, оның ішінде 3430 қылмыс тіркелді. Барлығы 22 тоннаға жуық есірткі тәркіленіп, 63 есірткі зертханасы жойылды.
Өткен жылы елімізде 45 ұйымдасқан қылмыстық топтың (ОПГ), соның ішінде 3 трансұлттық топтың қызметі әшкереленді. Киберқылмысқа қарсы күрес үшін арнайы профильді департамент құрылып, интернет алаяқтықты анықтау мен ашудың әдістерін жетілдіру жұмыстары жүргізілді. Осы бағытта өткен жылы ауыр және аса ауыр қылмыстар жасағаны үшін іздеуде болған 1949 қылмыскер ұсталды. Сонымен қатар, із-түзсіз жоғалған 1361 адамның қайда екені анықталды.
Қазақстанда өткен жылы 30 мыңнан астам жол-көлік оқиғасы тіркелген. Биыл полиция қызметкерлеріне жол қозғалысы ережелерін өрескел бұзатын жүргізушілермен цифрлық технологияларды қолдана отырып, нысаналы жұмыс жүргізу тапсырылды.
2024 жыл «Кадрлық әлеуетті жетілдіру жылы» деп жарияланған болатын. Ал 2025 жылды Ішкі істер министрі Ержан Саденов «Профилактика жылы: полиция – заң мен тәртіп күзетінде» деп атауды ұсынды.
Министрдің пікірінше, қылмыстың алдын алу – оның салдарымен күресуден әлдеқайда тиімдірек.