22 қараша күні Жамбыл атындағы Қазақ мемлекеттік академиялық филармониясының Үлкен залында Н.Тілендиев атындағы академиялық фольклорлы-этнографиялық «Отырар Сазы» оркестрінің Қазақ және КСРО халық әртісі, Мемлекеттік сыйлықтың лауреаты, Бибігүл Төлегенованың шығармашылығына арналған концерті өтеді,- деп хабарлайды newsroom.kz
Н.Тілендиев атындағы академиялық фольклорлы – этнографиялық оркестрі қазақтың ұлттық музыка аспаптарының – қазіргі және байырғы бай жинағымен танысу мүмкіндігін береді.
Сондай-ақ, оркестр Қазақстанның қалаларында ғана емес, сонымен қатар алыс-жақын шет елдерде – Иракта, Мароккода, Вьетнамда, Солтүстік Кореяда, Германияда, Испанияда, Түркияда, Сауд Аравиясы және басқа да көптеген елдерде концерттер берді.
Айта кетелік, 1996 жылы «Отырар сазы» оркестрі Жамбыл атындағы халықаралық қор сыйлығының лауреаты болды. Ұжым қазақтың музыкалық фольклорының үздік үлгілерін сақтап қана қоймай, қазіргі заманғы дыбыс үйлесіміндегі үнмен және оркестрдің бай тембрлік – бояулық мүмкіндіктерімен орындалған жаңа өңдеулермен жетілдіріп отырады.