Полицияға Шымкент тұрғыны арызданып, аялдамаға уақытша қалдыра тұрған 13 жастағы ұлының жоғалып кеткенін айтқан. Аталған хабарлама бойынша Созақ ауданының полициясы бірден әрекет етіп, баланы іздеуге жұмылдырылды, деп хабарлайды newsroom.kz порталы Otyrar.kz-ке сілтеме жасап.
Телеарнаның сайтында хабарланғандай, тәртіп сақшылары шағымданушы әкесі мен ұлының оқиғасын анықтап алып, олардың жүрген жолын тексерген. Дәмханалар мен ойын-сауық орталықтарын да назардан тыс қалдырмай, қарап шықты.
Осылайша жоспарлы жүргізілген іздеу жұмыстарының нәтижесінде кәмелет жасына толмаған бала тасжолдың бойынан табылды.
Полицейлердің анықтауы бойынша әкесі мен ұлы Шымкент қаласынан Созақ ауданына көлікпен қыдырып келе жатқан кезде, жасөспірім баласы өзін жайсыз сезінеді. Денсаулығы сыр берген ұлына дәрі-дәрмек қажет екенін түсінген әкесі ұлын аялдамаға қалдырып, өзі дәріханаға беттейді. Алайда дәріні дер кезінде жеткізгенімен, баласын аялдамадан таппай қалады.
Полицияның іздеу жұмыстарының арқасында бала отбасына аман-есен табысталды, ал әкесі сақшыларға шексіз алғысын жеткізді.