Қазақстандық былғары қолғап шебері Айбек Оралбай биыл Парижде (Франция) өтетін жазғы Олимпиада ойындарының лицензиясына ие болды,-деп хабарлайды Newsroom.kz
Айбек Оралбай (92 келі) Италияның Бусто-Арсицио қаласында өтіп жатқан бокстан лицензиялық турнирдің ширек финалында жұдырықтасты. Оның қарсыласы америкалық боксшы Джамар Талли болды. Үш раундқа созылған жекпе-жекте төрешілер жеңісті бірауыздан Айбекке берді. Осылайша қазақстандық боксшы Париж Олимпиадасына жолдама алды. Айта кетейік, Айбек Оралбай лицензиялық турнирдегі алғашқы жекпе-жегінде үндістандық Санжит Санжитті жеңген еді. Ал келесі кезеңде Юнг Ха Ныльден (Оңтүстік Корея) басым түсті. Кейін 1/8 финалда қазақстандық боксшы Кастилло Торресті ұтқан болатын.