Биыл 24 сәуірде Түркістан облысының Қазығұрт, Сарыағаш аудандарында жауын-шашын мен Кентау қаласында қатты жел болып, оның соңы табиғи апатқа ұштасты деп жазды newsroom.kz порталы.
Құтқару жұмыстарына облыстық ТЖД-ның және жергілікті атқарушы органдардың 100-ден аса қызметкері жұмылдырылды. Олар 15 техника, 13 мотопомпа күштерімен суды сору және арықтарды тазалау жұмыстарын жүргізді.
Табиғи апат салдарынан 50 адам қауіпсіз аймаққа көшірілді. Зардап шеккендер жоқ. Алдын ала есеп бойынша, 53 үйдің ауласына, 19 үйге, 1 мейрамхана мен 16 ғимаратқа су кіргені анықталды. Сонымен қатар, 370 бас мал шығыны болған.
Бұл жағдайға байланысты Мемлекет басшысы Қасым-Жомарт Тоқаевтың тапсырмасына сәйкес, облыс әкімінің төрағалығымен арнайы комиссия құрылды.
Енді апат салдарына облыстық бюджеттің резервтік қорынан қаржы қаралып, төмендегідей көмек көрсетілмек:
-
Үй жануарларының шығынына ережеге сәйкес өтемақы төленеді;
-
Тұрғын үйлер қайта қалпына келтіріледі;
-
Ғимараттар мен тұрғын үйлердің шатыры қалпына келтіріледі;
-
Шаруашылық ғимараттарды қалпына келтіруге көмек көрсетіледі.