Шығыс Қазақстан облысының кей аймақтарында интернет мүлдем жоқ, алайда Цифрлық даму министрлігінің құжаттарында барлығы керісінше. Бұл мәселені Мәжіліс депутаты Ерлан Сайыров төменгі палатаның жалпы отырысында көтерді, деп хабарлайды Newsroom.kz порталы azattyq-ruhy.kz сайтына сілтеме жасап
ШҚО Тарбағатай ауданындағы Асусай, Жалаңаш ауылды мекендерінде интернет жоқ. Бірақ министрліктің құжаттарында ол жақта интернет бар деп жазылып тұр. Зайсан ауданының Жалшы, Қарасай ауылдарында да интернет жоқ, алайда құжаттарда бар деп көрсетілген. Сонымен қатар, осы Зайсан, Тарбағатай, Марқакөл аудандарынан өткен кезде мобильді телефонға «Қытайға қош келдіңіз» деген хабарлама келеді. Министрліктің есептері мен шынайы өмірдің арасындағы айырмашылық жер мен көктей», - деді Ерлан Сайыров.
Депутат Цифрлық даму министрлігінің өкілінен осы мәселенің шешу жолын сұрады. Өйткені оның айтуынша, мұндай жағдай жергілікті халықтың психологиялық жағдайына кері әсер етуде.
Өз кезегінде Цифрлық даму, инновациялар және аэроғарыш өнеркәсібі министрінің орынбасары Асхат Оразбек аталған ауылдар туралы қолында нақты ақпараттың жоқтығын айтып, ресми түрде жазбаша жауап жолдайтынын мәлімдеді.
