Өзбекстан Президенті елдің кез-келген қауіпке барабар жауап беру үшін барлық қажетті әлеуеті мен күші бар екеніне сендірді деп жазады informburo.kz сілтеме жасаған newsroom.kz порталы.
Өзбекстан президенті Шавкат Мирзиеев Қауіпсіздік Кеңесінің отырысында Беларусь басшысы Александр Лукашенконың Қазақстанда болған оқиғалардан сабақ алуы тиіс деген мәлімдемесіне жауап берді. Бұл туралы Өзбекстан басшысының баспасөз хатшысы Шерзод Асадов Facebook-те хабарлады.
«Жақында кейбір мемлекеттердің басшылары Өзбекстан Қазақстандағы оқиғалардан сабақ алуы керек деген негізсіз мәлімдемелер жасады. Біз өңірдегі ахуалды, оның қауіпсіздігіне төнетін барлық сын-тегеуріндер мен қауіптерді мұқият қадағалаудамыз. Біз кез – келген қауіпке барабар жауап беру үшін барлық қажетті әлеует пен қуатқа иеміз», - деген Ш.Мирзиёевтың сөзін келтірді оның баспасөз хатшысы.
Қауіпсіздік Кеңесінің кеңейтілген отырысында Өзбекстан басшысы Қазақстандағы оқиғаларға жеке тоқталған.
«Бізді көрші және бауырлас Қазақстан Республикасында болған соңғы күндердегі оқиғалар алаңдатпай қоймайды. Біз мыңдаған жылдар бойы Қазақстан халқымен көрші өмір сүріп келеміз. Бізді ортақ тарих, дәстүрлер мен мәдениет байланыстырады. Біздің болашағымыз да тығыз байланысты. Бұл күндері мен Қазақстан президенті Қасым-Жомарт Тоқаевпен телефон арқылы бірнеше рет сөйлестім. Өзбекстан халқының атынан Қазақстан халқы мен басшылығына елдің тұрақтылығын, әл – ауқатын және өркендеуін қамтамасыз ету жөніндегі барлық күш-жігерінде өзінің берік қолдауын білдірді», - деп атап өтті Шавкат Мирзиёев.
Өзбекстан басшысы осы оқиғалар құрбандарының отбасылары мен барлық жақындарына тағы да көңіл айтып, зардап шеккендердің тезірек сауығып кетуіне тілектестік білдірді.
«Құдайға шүкір, көрші елдегі жағдай біртіндеп қалпына келеді, мемлекеттік және әлеуметтік құрылымдардың қызметі қалпына келтірілуде, азаматтардың күнделікті өмірі өз қалпына оралуда. Өз тарихында көптеген ауыр сынақтардан өткен дана Қазақстан халқы көп ұзамай осы күндердің қиындықтарын ерлікпен еңсеріп, қалыптасқан жағдайдан одан да күшті әрі ұйымшылдықпен шығатынына сенімдімін», – деді Шавкат Мирзиёев.
