Медотвод қалай беріледі? Денсаулықта кінәрат барын дәлелдейтін медициналық анықтаманы заңды түрде алудың жолдары жөнінде Санитарлық-эпидемиологиялық бақылау комитетінің мамандары мәлімдеме жасады. Дәрігерлердің сөзінше, бүгінде екпенің қарсы көрсетілімдері бар бірнеше санатқа бөлінетін дерттің тізімі белгілі. Қазір елімізде халықты коронавирустан қорғаудың қарқынды науқаны жүріп жатқанын ескерсек, ақ халаттыларға медициналық анықтама алғысы келгендер көптеп баратын болған, деп хабарлайды
newsroom.kz. порталы «Еуразия» бірінші арнасына сілтеме жасап.
Елімізде індетке қарсы вакцинациялау науқаны қарқынды жүріп жатыр. Сауда орталықтары мен ауруханаларда ашылған мобильді бекеттерде екпе алғысы келген жандардың қарасы қалың. Бірақ, оны салдырмау үшін медициналық анықтамаға жүгінгендер де жетерлік. Жуырда эпидемиологтар препаратқа қарсы көрсетілімдері бар дерттің тізімін жариялады.
"Санитарлық-эпидемиологиялық бақылау комитетінің дерегінше, бүгінде екпенің түрлі компоненттеріне қарсы көрсетілімдері бар азаматтардың санаты белгілі. Ең негізгі вакцинаға салуға болмайтын дерттің түрі, ол - созылмалы аурулар, обструктивті және бронх демікпесі, аллергиялық аурулар. Сондай-ақ, екпенің құрамындағы заттарға қарсы аллергиясы бар азаматтарға коронавирусқа қарсы вакцина алуға шектеу қойылады. Ал, жүкті және бала емізетін әйелдер, 18 жасқа дейінгі балалар екпе салдырудан уақытша босатылады. Себебі, елімізге аталған азаматтарға арналған препараттар әлі жеткізілген жоқ".
Соңғы мәліметтерге жүгінсек, елімізде екпенің бірінші компонентін салдырғандардың саны 6,4 млннапн асты. Бұл екпе алуға тиісті халықтың 50% құрайды. Ал, тұрғындардың 5 млннна астамы екі компонентін де ектірсе, енді бірі денсаулығына байланысты медициналық анықтама алуға емханаға келген.
"Әркім өзінің денсаулығын ойлау керек. Жалғыз өзін емес өзгелерді де ойлау керек. Өзі ауырып қалса өзгелерге жұқтырады".
"Сол операциядан кейін біраз уақыт салма деді. Қазір медотвод алайын деп жатырмын врачтардан. Қазір хирург келеді сосудистый. Сосын ол айтады, ол хирург қағаз береді сосын терапевтке жібереді. Терапевт операциядан кейін қай күнге қоятынын өздері біледі".
"Вакцина алдыңыз ба? Иә. Бәрі дұрыс екеуін де алдым".
Ал, ақ халаттылар вакцинаға салуға негізінен онкологиялық ауруларға шалдыққан адамдарға болмайтынын айтады. Ондай жандарға тіркелген емханасында медициналық құжат беріледі. Сондай-ақ, вакцинаның бірінші компонентін алған азаматтар, егер қарсы көрсетілімдер болса екінші препаратын да салдырмауға құқылы. Бірақ, бұл мәселе бойынша нақты шешімді учаскелік дәрігерлер қабылдайды.
"Туберкулез ауруларына салмаймыз. Және осының алдындағы прививкаларда алған екпеге реакция болса, анафилактикалық шок немесе отек болса олар босатылады. Инфекциялық жедел аурулар, ОРВИ-мен ауырса, инфекциялық аурулармен ауырса прививка салғызатын кезде, ол да жазылғанша салмаймыз",-дейді №1 қалалық емханасы басшысының емдеу ісі бойынша орынбасары Жәмилә Танлашева.
Заңды медициналық анықтаманы алу үшін жергілікті емханадан бірқатар сынама тапсыру қажет. Егер денсаулықтағы кінәрат дәлелденсе, құжат 3 айдан 1 жылға дейін беріледі.
"Жуырда мемлекеттік бас санитар дәрігерінің қаулысы шықты. Құжатта әр вакцинаның өзіндік қарсы көрсетілімдері бар екендігі айтылған. Азаматтардың иммунитеті алуан түрлі болғандықтан, денсаулығында кінәраты бар адамдарға қатты әсер етуі мүмкін. Сондай-ақ, негізгі қарсы көрсетілім ол ауыр аллергиялық реакция",-деді ҚР ДСМ санитарлық-эпидемиологиялық бақылау бомитетінің басқарма жетекшісі Марал Рахымжанова.
Айта кету керек. медициналық анықтама барлығына бірдей үлестірілмейді. Денсаулығында қарсы көрсетілімі бар тұрғындар өзінің мекенжайы бойынша тіркелген емханадан комиссиядан өтуі тиіс. Арнайы мамандар азаматтың жағдайын тексеріп, тиісті қорытынды шығарады. Жауапты ведомствоның дерегінше, бүгінде еліміз бойынша вакцинадан босатылған 15 мыңнан астам адам тіркелген.
