Алматы облысында полицейлер жезөкшелер қызмет етіп келген притонды анықтады. Олар клиенттерін мобильді қосымша арқылы тапқан, деп хабарлайды Newsroom+ ақпарат агенттігі Polisia.kz порталына сілтеме жасап.
Жеңіл жүрісті қыздар Қарасай ауданы Іргелі ауылындағы қонақүйде жезөкшелікпен айналысып келген. Ал притонды ұйымдастырған Қаскелең қаласының 39 жастағы тұрғыны болып шықты. Бұған қоса, тәртіп сақшылары 31 және 33 жастағы жеңгетайлар мен бірнеше түнгі көбелекті қолға түсірген.
Полицейлер анықтағандай, жезөкшелер клиент тартуға және жарнамаға арнайы құрастырылған мобильді қосымша пайдаланған.
"Бұл факт Қазақстан Республикасы Қылмыстық кодексінің 309-бабы 2-бөлімі "Жезөкшелікпен айналысу және притон ұйымдастыру" бойынша сотқа дейінгі тергеу жүріп жатыр. Күдіктілерге қатысты бұлтартпау шарасы тағайындалды", - деді ПД өкілдері.
