Шымкентте үйдің кіреберісінде зорлық әрекетін жасамақ болған ер адам видеоға түсіп қалды, - деп хабарлайды Newsroom+ақпарат агенттігі облыстық ПД баспасөз қызметіне сілтеме жасап.
Ведомство мәліметінше, 17 желтоқсан шамамен 23.15-те 102-ге Еңбекші ауданының Полиция басқармасына әйел адамға көмек қажет екені туралы хабар түскен.
"Оқиға орнына келген жедел-тергеу тобы 1950 жылы туған әйелді белгісіз біреу үйдің кіреберісінде зорламақ болғанын анықтады. Сол күні бұл дерек ҚР Қылмыстық кодексінің 24-бабының, 3-бөлігі - 120-бабының, 1-бөлігі ("Зорлау әрекеті") бойынша сотқа дейінгі тергеудің бірыңғай тізілімінде тіркелді. Қабылданған шаралармен күдіктінің жеке басы анықталды. Ол Шымкент қаласының тұрғыны, бірнеше рет сотталған", - деп хабарлады полиция өкілдері.Күдіктіні ұстауға қатысты барлық қажет жедел-іздестіру іс-шаралары жүргізіліп жатыр. Полиция оқиға "Қазақтелеком" АҚ көмегімен үйдің кіреберісіне орнатылып, Шымкент полиция департаментінің жедел басқару Орталығына қосылған камераға түсірілгенін айтты.