Батыс Қазақстан облысының энергетика және тұрғын үй-коммуналдық шаруашылық басқармасындағы ұрлыққа қатысты сотқа дейінгі тергеу басталды, деп мәлімдеді ҚР Сыбайлас жемқорлыққа қарсы іс-қимыл агенттігінің бірінші департаментінің ерекше маңызды істер бойынша тергеушісі Данияр Биғайдаров брифингте, деп хабарлайды Newsroom+Ақпарат агенттігі.
"Сыбайлас жемқорлыққа қарсы қызметтің Батыс Қазақстан облысы бойынша департаменті «БҚО Энергетика және тұрғын үй-коммуналдық шаруашылық басқармасы» мемлекеттік мекемесі басшысының орынбасарына қатысты аса ірі көлемде ұрлық фактісі бойынша сотқа дейінгі тергеуді бастады", - деді Биғайдаров.Оның айтуынша, 2019 жылдың тамызынан желтоқсанына дейін мердігермен бір топ адамдар 50 миллион теңгеден астам сомада бюджет қаражатын ұрлаған. Ол Түркістан облысы Арыс қаласында төтенше жағдайдың салдарын қалпына келтіру үшін 46 тұрғын үйді жөндеуге арналған қаражат екендігі де анықталды.