14 шілде мен 31 шілде аралығында үміткерлер аталмыш тестті APA.TALANTIZ.KZ онлайн платформасында тапсырады.
Қазақстан Республикасы Президентінің жанындағы мемлекеттік басқару Академиясы қазақ тілінен тестілеудің жаңа форматын енгізуде, - деп хабарлайды
NewsRoom+ Ақпарат тілшісі
Skifnews.kz порталына сілтеме жасап.
2020 жылдың мамыр айында мемлекеттік басқару Академиясы алғаш рет қазақ тілін деңгей бойынша оқыту тұжырымдамасының негізіне сүйене отырып, «RESMI QAZTEST» деп аталатын қазақ тілінен тестілеудің жаңа форматын әзірледі.
Пилоттық режимде іске қосылған аталмыш тест мемлекеттік қызметкерлерінің қазақ тілін меңгеру деңгейін анықтауға мүмкіндік береді.
Тест қазіргі таңда Академияға оқуға тапсырған үміткерлердің мемлекеттік тілді меңгеру құзыреттілігін анықтау мақсатында білім беру бағдарламаларына іріктеу жүргізу кезінде, яғни, конкурстық іріктеу кезеңінде қолданылып, апробациядан өту үстінде.
Тестілеу жоғары оқу орнынан кейінгі ересек аудиторияның қазақ тілінің ғылыми, ресми, публицистикалық стильдері бойынша әр түрлі көлемдегі бірізді мәтін құрастыру (баяндамалық, талдамалы-сараптамалық), көпшілік алдында сөз сөйлеу дағдыларын деңгейлеп анықтауға мүмкіндік береді.
«Қазақстан Республикасының білім беру мекемелерінде қазақ тілі балабақшадан бастап жоғары оқу орындарына дейін оқытылады, нормативтік құқықтық құжаттармен қамтамасыз етілген, ал, жоғары оқу орнынан кейінгі тілді кәсіби саланың бағытына бейімдеп оқыту нормативті-құқықтық тұрғыдан қарастырылмаған.
Мемлекеттік қызметкерлерінің көпшілігі қазақ тілін ауызекі стилінде ғана қолданады, ресми стильдің жазылымы мен мәтін құрастыру техникасын, әдіс-тәсілдерін жоғары оқу орнында игермеген, көпшілік алдында сөз сөйлеудің стратегияларын қолданбайды», - деп атап өтті «RESMI QAZTEST» тестілеуін құрастырушылардың бірі - Мемлекеттік тілді оқыту кабинетінің меңгерушісі Нәзигүл Төленбергенова.
Ресмиқазтест әлемдік тәжірибелерді ескере отырып әзірленген және тыңдау, көпшілік алдында сөйлеу, ресми оқу, ресми жазу және CEFR сынды халықаралық тестілеу орталықтарының орфографиялық нормаларын қамтиды: базалық деңгей (В1, В2) және еркін деңгей (С, С2). Үміткердің қазақ тілін меңгеру құзыреттілігін анықтауға арналған «RESMI QAZTEST» тыңдалым, лексика-грамматика, жазылым, сұхбат бөлімдерінен тұрады.
Тыңдалым бөлімі – үміткердің 1,5-2 минуттық видеода көрсетілген ақпараттың өзектілігін дұрыс түсінуіне бағытталса, лексика-грамматикалық бөлім – сөздер мен сөз тіркестерінің лексикалық мәнін анықтау мақсатында әзірленген. Жазылым бөліміт тест тапсырушының ресми стильде мәтін құрастыра алу дағдысын, сұхбат бөлімі үміткердің көпшілік алдында сөз сөйлеу дағдыларын анықтауға бағытталған.
«
Бұл қажеттіліктен туындап отыр, біріншіден, мемлекеттік қызметкерлердің ресми стиль бойынша білімдері бірізді анықталады, кәсіби қызметке қажетті білім Академияда меңгертіледі, екіншіден, мемлекеттік аппарат тілдік жағынан кәсібилендіріледі, соның ішінде, деңгейлеп оқыту бағдарламаларын енгізу арқылы мемлекеттік қызметкерлерінің қазақ тілінің ресми стилінде оқу, тыңдау, сөйлеу, жазу дағдылары дамытылады»,- деді Нәзигүл Төленбергенова өз сөзінде.
Қазіргі таңда Мемлекеттік басқару академиясына оқуға түсуге үміткерлер ResmiQazTest-ті пилоттық форматта сынақтан өткізуде.
14 шілде мен 31 шілде аралығында үміткерлер аталмыш тестті APA.TALANTIZ.KZ онлайн платформасында тапсырады.
Оқуға қабылданған, алайда мемлекеттік тілді меңгеру дәрежесі B1-ден төмен болғандар Академияның қашықтан оқыту курстарынан немесе өзге тіл орталықтарының курстарынан өту арқылы оқу жылы басталғанға дейін өз деңгейлерін талап етілетін межеге дейін көтерулері қажет.
