Түркістан облысы

Өмірзақ Шөкеев: «TURKISTAN» телеарнасын халықаралық деңгейге көтеруіміз керек

Түркістан облысы әкімінің баспасөз қызметі дереккөздеріне сүйене отырып, биыл «Turkistan» телеарнасы республикалық деңгейдегі «Тұмар» телевизиялық байқауында «Үздік аймақтық телеарна» аталымы бойынша жеңімпаз атанды деп newsroom.kz хабарлайды.

Ашылғанына 1,5 жылдан енді асқан жас ұжымның журналистері одан өзге байқауларда да жеңіске жетіп үлгерді. Елге ақпарат беруде жаңа тәсілдерді қолданып, көрерменнің ықыласына ие болып жүр. Бүгін Түркістан облысының әкімі Өмірзақ Шөкеев телеарнаға арнайы барып, журналистер ұжымымен кездесті. Оларды жетістіктерімен құттықтап, ұсыныстарын тыңдады.

– Сіздерді алғашқы жеңістеріңізбен құттықтаймын. Жас телеарна қысқа мерзімде өз көрерменін тапты. Сіздер еңбектеріңіздің, ізденістеріңіздің, талпыныстарыңыздың арқасында жеңіске жетіп отырсыздар. Сүйінші жаңалықтарға қуанып отырмыз. Облыс әкімдігі тарапынан телеарнаға әрдайым қолдау көрсетіледі. Әр өңірдің өз телеарнасы болуы керек. Бірақ біз тек облыс емес, телеарнаны халықаралық деңгейге көтеруіміз қажет. Ол үшін бар мүмкіндік бар. Түркі мемлекеттерінің өкілдерімен, ТүркПА басшыларымен кездесуде олар да телеарнаны Түркі әлеміне таратуға қолдау көрсететінін айтқан болатын. Ол біздің телеарна сол қолдауға лайық деңгейге жетуі тиіс. Жалпы өңірімізде талантты жастар көп. Жергілікті кадрларды дайындап, өсірсек, сонда ғана нәтиже болады. Бізде оған толық мүмкіншілік бар. Түркістан – ұлтымыздың болмысы сақталған өңір, жастардың тәрбиесі де, дүниетанымы да қазақи. Сондықтан «Turkistan» ең қазақи әрі үздік телеарналардың бірі болады деп ойлаймын. Жас таланттарды табуға демографиялық жағдай да толық мүмкіндік береді, – деді Өмірзақ Шөкеев.

«Turkistan Media Holding» ЖШС бас директоры Жанахмет Ағыбаев телеарнаны дамыту бағытында атқарылған жұмыстар мен жаңа жобалармен таныстырды. Қолдау көрсеткен өңір басшысына алғысын жеткізді. Телеарна ұжымының 85 пайызы жергілікті кадрлар екенін айтқан бас директор жастардың шеберлігін шыңдау, телеарнаның таралу аумағын кеңейту жөніндегі жұмыстарды баяндады. Оның айтуынша, «Turkistan» телеарнасы цифрлық жүйе арқылы Түркістан, Алматы, Жамбыл облыстары мен Шымкент қаласына тарайды. Ал ID және BeeTV арқылы 17 өңірді толық қамтып отыр. TNS рейтингі бойынша түркістандық телеарна республикада үздік ондыққа еніп отыр. Қазіргі таңда тәулігіне 18 сағат хабар таратып, 30 төл жобасын жұртшылыққа ұсынуда. Ал биыл маусым айында жаңа 7 жобаның тұсауы кесілді.

Кездесуде телеарна журналистері ақпараттық саланы дамыту және өзге де мәселелер бойынша сұрақтарын қойып, облыс әкімімен еркін пікір алмасты. Әсерлі жүздесуден кейін Өмірзақ Шөкеев телеарнаның «Билік пен Бұқара» атты жаңа бағдарламасына сұхбат берді.

Фото: Түркістан облысы әкімінің баспасөз қызметі

Жазба қандай әсер қалдырды?

Жазбаға баға беріңіз!

Орташа 3.4 / 5. Бағалар саны: 5

Әзір ешкім бағаламапты. Алғашқы болып баға беріңіз!

Пікір жазу үшін басыңыз

Leave a Reply

Э-пошта мекенжайыңыз жарияланбайды.

Ең Танымал

Редакциямен байланыс:

E-mail: info@newsroom.kz

Телефондар: +7 (700) 685-71-25, Нұр-Сұлтан қ.

ZERO.kz

Лицензия

ҚР Ақпарат және коммуникациялар министрлігінің 25.05.2017 жылдан №16544 «NewsRoom +» АА Куәлігі берілген.
© 2017-2022
Сайттағы материалдарды пайдаланғанда міндетті түрде сілтеме берулеріңізді сұраймыз. Ақпараттық порталдағы авторлық және басқа да құқықтар толығымен қорғалатынын ескертеміз. Автордың жеке пікірі редакцияның көзқарасы болып саналмайды. Жарнама мен түрлі хабарландыруларға жарнама беруші жауапты.