Жаңалықтар

«Айбын» VIII республикалық әскери-патриоттық жастар жиыны аяқталды

Қарағанды облысындағы полигонда балалар жылына және Қазақстан Қарулы күштерінің 30 жылдығына арналған «Айбын» республикалық жиынының салтанатты жабылу рәсімі өтті, деп newsroom.kz хабарлайды Қорғаныс министрлігіне сілтеме жасап.

«Мемлекет басшысы Қасым-Жомарт Кемелұлы Тоқаевтың қолдауымен бүгінде қазақстандық жастарға ерекше көңіл бөлініп отыр. Жарысқа белсенді түрде қатысып, әскери іспен айналысуды құптадыңдар. Өздеріңнің жетістіктеріңді, білімдерің мен дағдыларыңды көрсеттіңдер, жаңа достар таптыңдар. Төзімділік сыналды», – деді Қорғаныс министрінің орынбасары, генерал-лейтенант Сұлтан Камалетдинов жиынға қатысушыларға.

Жиынға Нұр-Сұлтан, Алматы және Шымкент қалаларының, облыстардың әскери-патриоттық клубтарының, Қарулы күштердің, басқа да әскер мен әскери құралымдардының әскери колледждерінің, мектеп-интернаттарының, «Жас ұлан» республикалық мектептерінің 600-ге жуық жасөспірімі қатысты. Тартысты, табанды күресте барлық өңірден келген ұл-қыздар зияткерлік және шығармашылық байқауларда, әскери-қолданбалы спорт түрлерінен өткен жарыстарда бағын сынады.

Олардың жетістіктеріне қуанып, жарыстың аяқталуымен құттықтауға Спасскіге Халық қаһарманы, Ауған соғысының ардагері генерал-лейтенант Бақытжан Ертаев, генерал-майор Әлихан Жарболов, контр-адмирал Ратмир Комратов, генерал-майор Мұқан Дүйсекеев, авиация генерал-майоры Алсай Жұманов, Қарағанды облысы әкімінің орынбасары Ербол Әліқұлов барды.

«Сапта тұрған әрқайсың ынтамен білім алып, үздіксіз ізденіп, өздеріңді дамытумен айналысатын болсаңдар, міндетті түрде мақсаттарыңа жететіндеріңе сенемін», – деді Қорғаныс министрінің орынбасары, генерал-майор Мұхамеджан Таласов жиынға қатысушыларға арнаған сөзінде.


Сонымен, қорытынды мынадай:

ҰҚК Шекара қызметінің «Сұңқар» әскери-патриоттық клубынан Дарья Токарева «Жас сарбаз – жас тілші», Жетісу облысының «Жетісу тарландары» әскери-патриоттық клубынан Серікжан Бақтыбай «Үздік жас сарбаз» атанды.

Нұр-Сұлтан, Алматы, Шымкент қалалары мен облыстар арасында І орынды Жетісу облысының «Жетісу тарландары» әскери-патриоттық клубы, II орынды Түркістан облысының «Арыс» әскери-патриоттық клубы, III орынды Ақмола облысының «Жас сарбаз» әскери-патриоттық клубы олжалады.

Қарулы күштер, басқа да әскер мен әскери құралымдар әскери-патриоттық клубтарының жарыстарында «Оңтүстік» өңірлік қолбасшылығы «Болашақ» әскери-патриоттық клубының командасы жеңіске жетті. ІІ орынды Құрлық әскерлерінің «Жас байланысшы» әскери-патриоттық клубы алды. Әскери полиция бас басқармасының «Жас ұлан» әскери-патриоттық клубына III орын бұйырды.

«Жас ұлан» республикалық мектептері мен облыстық әскери мектеп-интернаттары арасында I орынды Сағадат Нұрмағамбетов атындағы елордалық әскери колледждің командасы жеңіп алды. II орынды шымкенттік Сабыр Рахымов атындағы «Жас ұлан» республикалық мектебі, III орынды Семейдегі Шоқан Уәлиханов атындағы «Жас ұлан» арнайы мектеп-лицей-интернаты иеленді.

«Айбын» республикалық жастар жиынының бас жүлдесін Жетісу облысынан келген «Жетісу тарландары» әскери-патриоттық клубы еншіледі.

«Әскери медиа» жобасы аясында әскери салада жүрген сарбаздар, сержанттар және офицерлердің қызметтік борышынан бөлек, қарапайым өмірдегі қызығушылықтары, өмірлік ұстанымдары және елдің дамуына қосып жатқан үлесі жазылады.

Бұл іс-шара «Азаматтық бастамаларды қолдау орталығы» КеАҚ-тың қолдауымен «Алматы» студенттер Альянсы» корпоративтік қорының ұйымдастырып жатқан «Жастарды әскери-патриоттық тәрбиелеу бойынша кешенді іс-шараларды өткізу» жобасы аясындағы «Әскери медиа» шағын грант негізінде жүзеге асырылып отыр.

Жазба қандай әсер қалдырды?

Жазбаға баға беріңіз!

Орташа 5 / 5. Бағалар саны: 1

Әзір ешкім бағаламапты. Алғашқы болып баға беріңіз!

Пікір жазу үшін басыңыз

Leave a Reply

Э-пошта мекенжайыңыз жарияланбайды.

Ең Танымал

Редакциямен байланыс:

E-mail: info@newsroom.kz

Телефондар: +7 (700) 685-71-25, Нұр-Сұлтан қ.

ZERO.kz

Лицензия

ҚР Ақпарат және коммуникациялар министрлігінің 25.05.2017 жылдан №16544 «NewsRoom +» АА Куәлігі берілген.
© 2017-2022
Сайттағы материалдарды пайдаланғанда міндетті түрде сілтеме берулеріңізді сұраймыз. Ақпараттық порталдағы авторлық және басқа да құқықтар толығымен қорғалатынын ескертеміз. Автордың жеке пікірі редакцияның көзқарасы болып саналмайды. Жарнама мен түрлі хабарландыруларға жарнама беруші жауапты.