Жаңалықтар

Әкімдіктен қуып шығарылған тілші оқиғаның мән-жайын айтты

1
(1)

«Журналисттің келгенін маған ешкім айтқан жоқ». Басы дауға қалған Алматыдағы Алатау ауданының әкімі Азамат Қалдыбеков осылай деп ақталды. Ал күзетші далаға шығарып тастаған Ақбөпе Тәңірберген «әкімге тілшілердің өзі кіре алмағанда қарапайым халықты қалай қабылдайды» деп жағасын ұстады. Бұқаралық ақпарат құралы өкілінің келгенін нөкерлер басшыға жеткізбеді ме, әлде әкім камерадан қорықты ма, бәлкім біздің әріптесіміз тәртіпке бағынбай шу шығарды ма? Бұл туралы «Еуразия» бірінші арнасына сілтеме жасап NewsRoom.kz. порталы хабарлайды.

Мынау журналист Ақбөпе Тәңірбергеннің Алатау ауданы әкімдігіне келгендегі видеосы. Лифтіге кірмек болған кезде күзетші оны беліне қапсыра құшақтап, далаға алып шығып, лақтырып жібереді. Осыдан кейін қайта кірмесін деген пиғылмен есікті тарс жауып тастайды. Әкімдік қызметкерінің бұл әрекеті қоғамда резонанс тудырып, тіпті бұл оқиғаға қатысты Ақпарат және қоғамдық даму министрі көзқарасын білдірді. Аида Балаеваның пікірінше, бұл оқиға «еститін мемлекет», «ашық әкімдік» қағидаларына қайшы келетін жағдай.
«Журналистердің құқығын бұзуға, олардың ресми жұмысына кедергі келтіріп, күш көрсетуге ешқашан жол берілмеуі керек. Олар өздерін қай жерде де еркін сезінуге тиіс. БАҚ өкілдері еліміздің тиісті заңнамалары мен нормативті-құқықтық актілеріне сәйкес қажетті толыққанды ақпарат алуға қай кезде де құқылы… Алдағы уақытта қай жерде болмасын, БАҚ өкілдеріне қатысты бұндай келеңсіз жағдайларға жол берілмеуі қажет».

ҚР Ақпарат және қоғамдық даму министрі Аида Балаеваның Facebook-тегі парақшасынан

Ал журналист Ақбөпе Тәңірберген Алатау ауданының әкімдігіне бірнеше мәрте келгенін айтады. Әкім Азамат Қалдыбековтен сұхбат алу үшін. Аппарат басшысы шығып, басшыларының сағат 17.30-да интервью беретінін жеткізіпті. Келісілген уақытта келгенінде әкімнің орнында жоқ екенін айтыпты. Құрғақ уәдеге әбден тойып, ешкімнің шықпайтынына көзі жеткен соң ішке кіруге талпынғанын айтады.
«Жұмыс күні аяқталды. Іштен адам шығатын емес, телефон шалса көтермейді. Күзетшілерге ішке хабарласыңыз десе хабарласпайды. Еріксіз түрде, мәжбүрлі түрде турникеттен өтіп кетуге тура келді. Мәселе осы жерде туындады. Лифтке өтпек болған кезімде мені зат ұқсап алып лақтырып жіберіп отыр ғой былайша айтқанда. Лақтырып жібергеннен кейін де бір сағат әкімдіктің алдында тұрдым. Бәлкім іштен біреу шығар, бәлкім кешірім өтінер, бәлкім су алып шыға ма, ешкім шыққан жоқ»,-дейді Ақбөпе журналист Тәңірберген.

Ал әкімдік қызметкерлерінің бұл оқиғаға қатысты өз уәждері бар. Олар журналистің ғимаратқа келгендегі видеосын жариялады. Онда тілшінің турникеттің астынан өтіп, ішке кіріп кеткені түсіп қалған. Яғни, карантин талабын елемеді, «Ашықтағы» статусын көрсетпеді деп отыр. Бұл келеңсіз жағдайға байланысты қазіргі таңда арнайы комиссия құрылып, қызметтік тексеру басталған. Аудан әкімі журналистің келгені туралы ешкімнің ескертпегенін айтады. Ал оқиға болған кезде  «Шексіз қала» бағдарламасы аясында қаланы аралап жүріпті.

«Маған мән-жай бойынша жеткізген жоқ. Мен ғимаратта болған жоқпын, ондай тапсырманы күзетшіге немесе басқа кісілерге берген жоқпын. Сондықтанда бұл мән-жайды толықтай тексеру өткізгеннен кейін. Бірақ бүкіл журналистердің сауалдарына, халықтың сауалдарына жауап беруге дайынбыз»,-дейді Алатау ауданының әкімі Азамат Қалдыбеков.

Аудан әкімі халыққа жақын екенін айтып, кез-келген уақытта жауап беруге әзір екенін жеткізді. Ал күзетшіден зәбір көрген тілші әкімдікке кәргізбей қойған оқиғалар болған, бірақ далаға лақтырып тастаған бірінші рет болып отыр дейді. Аяқ-қолы көгеріп қалған журналист полицияға шағым түсірген. Мақсаты- өтемақы өндіріп алу емес, кіналі тұлғаларды жауапқа тарту екенін айтады. Ал, күзетші тексеру жұмыстары аяқталғанша уақытша жұмыстан шеттеліліпті. «Тек күзетші емес, осыған жауапты мемлекеттік қызметкерлер жауапсыз қалмайды» деп сендірді Алатау ауданының әкімі Азамат Қалдыбеков.

 

 

Жазба қандай әсер қалдырды?

Жазбаға баға беріңіз!

Орташа 1 / 5. Бағалар саны: 1

Әзір ешкім бағаламапты. Алғашқы болып баға беріңіз!



Пікір жазу

Э-пошта мекенжайыңыз жарияланбайды. Міндетті өрістер * таңбаланған

Back to top button