Алматыда Жанболат Мамайға қатысты сот үкімі шықты, деп newsroom.kz хабарлайды inbusiness.kz дереккөзіне сүйене отырып.
Алматы қалалық сотының баспасөз қызметі мәліметінше, ол 6 жылға шартты түрде бас бостандығынан айырылды.
Алматы қаласы Бостандық ауданының №2 аудандық сотында Мамайды құқықбұзушылық жасады деп айыптау іс қаралды: билік өкілдерін қызметтік міндеттерін пайдалану кезінде қорлау, көрінеу жалған ақпарат тарату және жаппай тәртіпсіздіктер ұйымдастыру (378-бап 2-бөлігі, 274-бап 2-бөлігі 3-тармақ, 272-бап 1-бөлігі).
«Жанболат Мамай кінәлі деп танылды. Сот жазаны тағайындау кезінде сотталған адамның мінез-құлқы және үш жас баласының болуын ескерді. Айыпты ауырлататын жағдайлар есептелмеді», делінген сот хабарламасында.
Сондай-ақ, бұл ретте билік өкілдерін қорлағаны үшін ескіру мерзімі аяқталуына байланысты іс тоқтатылғаны атап өтілді.
«Көрінеу жалған ақпарат таратқаны және Қылмыстық Кодекстің 63 – бабының негізінде жаппай тәртіпсіздіктерді ұйымдастырғаны үшін әлеуметтік желілерде қоғамдық-саяси қызметпен және публицистикалық қызметпен айналысу құқығынан 6 жылға айыра отырып 6 жылға шартты түрде бас бостандығынан айыру жазасы тағайындалды», делінген Алматы сотының баспасөз қызметі таратқан мәлімдемеде.
Сот үкімі заңды күшіне енген жоқ.
