Астанада Telegram арқылы танысып, ер адамдарды қорқытқан үш азамат сотталды
Астанада Telegram-да жалған қыздар аккаунттарын ашып, ер адамдарды алдап кездесуге шақырған үш қала тұрғынына 7 жылдан 8 жылға дейін жаза кесілді. Олар жәбірленушілерді күшпен қала сыртына шығарып, ақша бопсалаған.
Астанада ер адамдарды Telegram арқылы алдап, күш қолдану арқылы ақша бопсалаған үш қала тұрғыны 7 жылдан 8 жылға дейінгі мерзімге сотталды. Бұл туралы қала прокуратурасы хабарлады.
Іс материалдарына қарағанда, олар мессенджерде қыздардың атынан жалған аккаунттар ашып, жәбірленушілермен кездесуге уағдаласқан. Кейін оларды күшпен қала сыртына алып шығып, соққыға жыққан және ақша талап еткен.
Егер талап орындалмаса, олар компромат ретінде видео таратамыз деп қорқытқан. Осы тәсілмен күдіктілер үш жәбірленушіден жалпы 2,2 млн теңге алған.
Олардың біреуін микрокредит рәсімдеуге мәжбүрлеген, ал екіншісінің көлігін тартып алған.
Сот жәбірленушілердің келтірілген шығынды өтеу туралы талаптарын қанағаттандырды. Үкім заңды күшіне енді.
Прокуратура азаматтарды әлеуметтік желілер мен мессенджерлерде танысу кезінде сақ болуға шақырды.