Бозымбаевтың айтуынша, комиссия қайғылы оқиғаның барлық мән-жайын анықтайды. Оқиғаға байланысты қылмыстық істер қозғалып, тергеу басталған.
«Тергеу барынша мұқият, жан-жақты әрі қысқа мерзімде жүргізіледі. Қайғылы оқиғаға себеп болған әрбір лауазымды тұлға заң алдында ең қатаң түрде жауап береді», – деді вице-премьер.
Қазір оқиға бойынша ведомствоаралық жедел-тергеу тобы жұмыс істеп жатыр. Қажетті сот сараптамалары тағайындалған. Қылмыстық істер ҚР Қылмыстық кодексінің 453-бабы 2-бөлігі («Ауыр зардаптарға әкеп соққан қызметке салғырт қарау») және 465-бабы («Кеме жүргізу қағидаларын бұзу») бойынша қозғалған.
Сонымен қатар қаза тапқан әскери қызметшілердің отбасыларына материалдық және өзге де қажетті көмек көрсетіледі. Бозымбаев тергеу барысы мен отбасыларға қолдау көрсету жұмыстарын жеке бақылауына алғанын айтты.
Айта кетейік, қазіргі ресми мәлімет бойынша, Маңғыстау облысындағы қайғылы оқиға салдарынан 12 әскери қызметші қаза тапқан, үшеуі құтқарылған. Екі әскери қызметшіні іздеу жұмыстары жалғасып жатыр.
