«Қазақстан саяси дамудың жаңа кезеңіне қадам басты»: сарапшылар Құрылтай сайлауын талқылады
Құрылтай депутаттарының алғашқы сайлауы елдің саяси жүйесіндегі жаңа кезеңнің басталуын айқындады. Сайлау қорытындылары мен оның елдің алдағы саяси дамуына ықпалы Қазақстанның стратегиялық зерттеулер институты алаңында сарапшылардың қатысуымен талқыланды. Бұл туралы Newsroom.kz хабарлайды.
Сарапшылар Құрылтайдың құрылуы жаңа Конституция аясындағы саяси өзгерістердің маңызды нәтижелерінің бірі екенін атап өтті. Жаңа бір палаталы өкілді органның қалыптасуы заң шығару жүйесі мен мемлекеттік басқару тетіктерінің жаңаруына жол ашады.
Бұған дейін ҚСЗИ сарапшылары Құрылтай сайлауын Қазақстанның жаңа саяси моделін қалыптастыратын маңызды кезең ретінде бағалаған болатын.
Сайлау науқаны кезінде азаматтардың дауыс беруге дайындығы да жоғары деңгейде сақталған. ҚСЗИ жүргізген зерттеулердің талдауына сәйкес, сайлаушылардың өз таңдауын алдын ала айқындау деңгейі артып, партияларға қатысты көзқарастар біртіндеп нақтылана түскен.
Сарапшылардың пікірінше, ендігі маңызды мәселе – сайлау нәтижелерінен кейін Құрылтайдың тиімді жұмыс істеуі және азаматтардың сұранысына жауап бере алуы.
Жаңа органның алдағы қызметі заң шығару сапасына, партиялардың қоғамдық-саяси белсенділігіне және азаматтардың мемлекеттік институттарға деген сеніміне тікелей әсер етуі мүмкін.
Осылайша, алғашқы Құрылтай сайлауы аяқталғанымен, сарапшылар үшін басты кезең енді басталады – жаңа саяси институттың іс жүзіндегі жұмысы мен оның қоғам өміріне ықпалын бағалау.