Тайфунның жақындауына байланысты Шанхайдағы Пудун және Хунцяо халықаралық әуежайларында жоспарланған рейстердің шамамен 60 пайызы орындалмай қалды. Билік су басу қаупі бар аумақтардан тұрғындарды эвакуациялады. Қытайдың шығыс өңірлерінде қауіпсіздік шаралары күшейтілді.
«Dolphin» тайфунының тұрақты жел жылдамдығы сағатына 162 шақырымға дейін жеткен. Синоптиктер кейбір аудандарда жауын-шашын мөлшері 400 миллиметрге дейін жетуі мүмкін екенін ескерткен. Мұндай көлемдегі жауын өзендердегі су деңгейінің күрт көтерілуіне, су тасқыны мен көшкін қаупінің артуына әкелуі ықтимал.
9 тамыз күні кешке тайфун Чжэцзян провинциясының жағалауына жетті. Құрлыққа шыққаннан кейін оның күші біртіндеп әлсірегенімен, нөсер жауын мен қатты желдің әсері бірқатар аумақта сақталды. Шанхайдың кейбір аудандарында көшелерді су басып, көлік қозғалысы мен қоғамдық қызметтердің жұмысына шектеулер енгізілді.
Мамандардың басты алаңдаушылығы — нөсер жауынның салдарынан болатын су тасқыны, өзендердегі су деңгейінің көтерілуі және таулы аймақтардағы көшкін қаупі. Қытай билігі тұрғындарға қауіпсіздік талаптарын сақтап, ауа райына байланысты ескертулерді назардан тыс қалдырмауға шақырды.
Тайфунның әсері тек Шанхаймен шектелмей, Қытайдың шығысындағы Чжэцзян, Аньхой, Цзянсу және Шаньдун провинцияларына да тарады.
