Еңбек және халықты әлеуметтік қорғау министрлігінің мәліметінше, енді экономикалық ұтқырлық сертификатының ең жоғары сомасы 7 млн теңгеге дейін (1 625 АЕК) ұлғайтылды. Бұл қаржыны жаңа қоныста тұрғын үй сатып алуға жұмсауға болады.
Бағдарламадағы өзгерістер азаматтардың тек көшіп баруына емес, жаңа өңірде тұрақтап, баспаналы болып, тұрақты өмір сүруіне жағдай жасауға бағытталған.
Қоныс аударушыларға тұрғын үй сертификатынан бөлек, көшу шығындарына субсидия қарастырылған. Сондай-ақ тұрғын үйді жалдау ақысы мен коммуналдық төлемдердің бір бөлігі өтеліп, жұмысқа орналасуға жан-жақты қолдау көрсетіледі. Азаматтар көшпей тұрып-ақ жұмыс берушіні таңдап, қолайлы бос жұмыс орнын таба алады. Ол үшін қабылдаушы өңірлерде тұрақты түрде бос жұмыс орындарының жәрмеңкелері ұйымдастырылады.
Бағдарламаға қатыса алатын азаматтар санаты да кеңейді. Енді оған жұмыссыздармен қатар, еңбек нарығында сұранысқа ие мамандар, сондай-ақ шаруа және фермер қожалықтарының басшылары да қатыса алады.
Қызмет көрсету процесі толықтай цифрландырылған. Өтінім беру, өңірлер картасын қарау, сұранысқа ие мамандықтармен танысу және бос жұмыс орындарын іздеу migration.enbek.kzпорталы арқылы онлайн жүзеге асырылады.
Айта кетейік, 2017 жылдан бері бұл бағдарламаға 73,9 мың адам қатысқан. Соның ішінде 31 мыңға жуық азамат тұрақты жұмыспен қамтылған.
