Алматыға бет алған ұшақта жолаушы қайтыс болды
Scat әуе компаниясының Ақтөбе–Алматы бағытындағы DV712 рейсі жолаушының жағдайы күрт нашарлап кеткеннен кейін Ақтөбе әуежайына қайта қонды.
Компания мәліметінше, ұшу кезінде бір әйел жолаушының хәлі кенеттен нашарлаған. Экипаж дереу медициналық дабыл беріп, алғашқы көмек көрсете бастаған. Шақыруға борттағы кардиолог дәрігер мен медициналық білімі бар бірнеше жолаушы қосылып, реанимациялық шаралар жүргізген.
Әуе кемесінің командирі әуежайға шұғыл оралу туралы шешім қабылдады. Ұшақ қонған соң әйелді жедел жәрдем бригадасына тапсырып, олар реанимацияны жалғастырды. Алайда дәрігерлер оның өмірін сақтап қала алмады.
Авиакомпания марқұмның жақындарына көңіл айтып, бортта жолаушыға көмектесу үшін «барлық мүмкін шара жасалғанын» атап өтті.