Премьер-министр Энтони Альбанез видеоүндеуінде балаларды демалысты пайдалы өткізуге шақырды:
«Мектеп каникулын телефонға телмірумен емес, жаңа спорт түрін үйреніп, музыка аспабын меңгеріп немесе көптен бері оқылмай тұрған кітапты парақтап өткізіңіз. Ең бастысы — жақындарыңызбен, достарыңызбен тірі қарым-қатынаста уақыт өткізіңіз», — деді ол.
Жаңа заңды орындамаған платформаларға 49,5 млн австралия долларына (33 млн АҚШ доллары) дейін айыппұл салынады.
Тыйым ата-анасы рұқсат берген балаларға да жүрмейді — 16 жасқа толмаған ешбір бала әлеуметтік желіде аккаунт аша алмайды.
Қазір шектеу 10 платформаға енгізілген. Үкімет жасөспірімдер басқа қосымшаларға ауысқан жағдайда тізім кеңейтіле беретінін айтты.
Бұрынғы X желісінің иесі Илон Маск бұл шешімді «австралиялықтардың интернетке қолжетімділігін жасырын бақылау» деп бағалады. Бірқатар платформалар да сөз бостандығына нұқсан келеді деп отыр.
Соған қарамастан, тізімдегі барлық компания (X-ті қоспағанда) жаңа талаптарды орындайтынын мәлімдеді. Олар жас ерекшелігін онлайн-әрекет арқылы анықтау, селфи-фото арқылы жасын бағалау, қажет болса, жеке куәлік немесе аккаунтқа тіркелген банк мәліметтері арқылы тексеру жүйелерін енгізбек.
