Заң мен тәртіп – Түркістандағы қауіпсіз қоғамның іргетасы
Түркістан қаласында құқықтық тәртіпті нығайту, заң үстемдігін қамтамасыз ету және қоғамда қауіпсіз орта қалыптастыру бағытындағы жұмыстар кешенді түрде жүргізілуде.
Мемлекет басшысының «Халық үніне құлақ асатын мемлекет» тұжырымдамасын басшылыққа ала отырып, қала әкімдігі мен құқық қорғау органдары өзара тығыз байланыста жұмыс істеп келеді.
Бұл бағыттағы негізгі мақсат – қоғамның полицияға деген сенімін арттыру, азаматтардың құқықтық мәдениетін көтеру және құқық бұзушылыққа «нөлдік төзімділік» қағидатын орнықтыру.
🚦 Жол қауіпсіздігі мен инфрақұрылым жаңаруда
Қоғамдық тәртіп пен қауіпсіздіктің басты құрамдас бөлігі – жол қозғалысы ережелерін сақтау және жол инфрақұрылымының сапасын арттыру. Осы мақсатта Түркістан қаласында биыл ауқымды жұмыстар атқарылды. Қала аумағында бүгінде 93 бағдаршам нысаны жұмыс істейді. Оның ішінде 6 бағдаршам жүйесі жаңартылып, заманауи талаптарға сай қайта орнатылды.
Сонымен қатар жол белгілері мен сызықтарын жаңарту жұмыстары 60 негізгі көшені қамтыды. 2025 жылы жалпы ауданы 28 000 шаршы метр болатын жаяу жүргіншілер өткелдері жаңартылып, қайта сызылды. Ұзындығы 300 шақырымнан асатын жол бөлу сызықтары толықтай жаңартылды. Бұл шаралар жол-көлік оқиғаларының алдын алуға, жаяу жүргіншілердің қауіпсіздігін арттыруға және қаладағы қозғалыс мәдениетін қалыптастыруға оң ықпал етті.
Қала көшелерінде арнайы мониторинг жүргізу және бейнебақылау камераларын орнату жұмыстары да белсенді жалғасуда. Бұл жүйелер жол қозғалысының тәртібін бақылауға, жылдамдықты арттыру және жол ережесін бұзатындарды анықтауға мүмкіндік береді.
👶 Жасөспірімдер қауіпсіздігі – ортақ міндет
Бүгінгі таңда Түркістан қаласы бойынша 88 мектепте 56 945 оқушы білім алуда. Балалардың құқықтарын қорғау, олардың қауіпсіздігін қамтамасыз ету және кәмелетке толмағандар арасындағы құқық бұзушылықтың алдын алу мәселесі ерекше назарда. Осы мақсатта қала әкімі Әзімбек Пазылбекұлы мен қала прокуроры Кәукен Нәрікбаевтың төрағалығымен арнайы мекемеаралық кеңес өткізілді.
Кеңесте жасөспірімдердің қауіпсіздігін қамтамасыз ету тек білім беру мекемелерінің емес, барлық мемлекеттік құрылымдардың, ата-аналар мен қоғамның ортақ міндеті екені айтылды. Қалалық әкімдік пен білім бөлімі бірлесіп, 372 профилактикалық кездесу өткізді, құқықтық мәдениетті арттыруға бағытталған түсіндіру жұмыстарын жүргізді.
Мектептерде тәрбие және психологиялық қызметтер жүйелі жұмыс атқаруда. Құқық бұзуға бейім оқушылармен жеке әңгімелер, ата-аналармен кездесу, «Әлімжеттікке жол жоқ!» атты ақпараттық акциялар өткізілуде. Нәтижесінде оқушылар арасындағы құқық бұзушылық көрсеткіші төмендеп, ата-аналардың жауапкершілігі артты. Сонымен қатар, мектептерде еріктілер клубтары мен заңгерлік үйірмелер ұйымдастырылып, балалардың құқықтық білімін тереңдетуге бағытталған шаралар жалғасуда.
⚖️ «Халық заңгері» – құқықтық мәдениетке жаңа серпін
Құқықтық мәдениетті қалыптастыруда халық пен билік арасындағы ашық диалогтың маңызы зор. Осы мақсатта Түркістан қаласында ҚР Президенті Әкімшілігінің тапсырмасына сәйкес «Халық заңгері» республикалық акциясы ұйымдастырылды.
Акция барысында тұрғындарға әкімдік, прокуратура, полиция, сот, әділет органдары мен кәсіби адвокаттар тегін құқықтық кеңес берді. Азаматтар әлеуметтік, еңбек, тұрғын үй, отбасылық және жер қатынастарына байланысты сауалдарына нақты жауап алды.
Полиция департаменті басшылығының қатысуымен өткен іс-шарада азаматтар өз мәселелерін еркін жеткізіп, кәсіби құқықтық бағыт-бағдар алды. Мұндай бастамалар халықтың заңға деген құрметін арттырып, билік пен қоғам арасындағы сенімді күшейтеді. Сонымен қатар, акция барысында нақты жағдайларды талдау арқылы қалалық деңгейде құқық қорғау шараларын жетілдіру мүмкіндіктері қарастырылды, бұл болашақта құқық бұзушылықтарды алдын алуға оң әсер етеді.