Мұғалімдер мен тәрбиешілердің табысы көбейді, бірақ инфляция бүкіл өсімді «жеп қойды»

Биыл екінші тоқсанда білім беру саласында жұмыспен қамтылғандар саны 1,2 млн адамды құрады, бұл былтырғыдан 3,3% артық, деп хабарлайды newsroom.kz.

Жұмыспен қамтылғандардың ең көп саны Түркістан облысында: 147,8 мың адам, бір жылда 2,1% азайған. Одан кейін Алматы (112,1 мың адам, 14,9% көбейген) және Жамбыл облысы (83,4 мың адам, 1,3% көбейген).

Жұмыспен қамтылғандардың ең азы Ұлытау облысында: бар болғаны 14,6 мың адам, 6,2% көбейген.

Биыл екінші тоқсан қорытындысы бойынша, білім беру саласы қызметкерлерінің атаулы айлық орташа жалақысы 323,2 мың теңгеге жетіп, былтырғымен салыстырғанда ақшалай түрде 10,2% көбейді. Алайда инфляцияны есепке алғанда нақты жалақы индексі 95,2%-ды құрады, яғни саладағы жалақының сатып алу қабілеті 4,8% төмендеді. Салыстыру үшін: орташа республикалық номиналды жалақы 365,5 мың теңгені құрады, нақты мәнде бір жылда 1,2% көбейген.

Өңірлер бойынша білім беру саласындағы ең жоғары жалақы Астана қаласында: 468 мың теңге — былтырғыдан ақшалай түрде 13% артық. Елордадағы жалақы республикалық көрсеткіштен 44,8% жоғары. Екінші және үшінші орындарда Алматы (360 мың теңге, 7,2% көбейген) мен Маңғыстау облысы (339,2 мың теңге, 4% көбейген). ҚР-ның 20 өңірінің 6-да ғана білім саласы қызметкерлерінің жалақысы республикалық орташа деңгейден жоғары.

Биыл екінші тоқсанда ең төменгі жалақыны мектепке дейінгі білім беру саласының қызметкерлері алды: бар болғаны 168,8 мың теңге, бір жылда ақшалай 14,6% көбейді. Бастауыш білім беру саласының қызметкерлері 268,3 мың теңге (10,2% көбейген), орта білім беруде — 376,9 мың теңге (9,7% көбейген), жоғары білім беруде — 354,4 мың теңге (9,7% көбейген) алды.

Білім беру саласындағы көмекші қызмет қызметкерлерінің орташа айлық жалақысы 259,1 мың теңге (ақшалай өсім 19,5%), білім берудің басқа түрлері қызметкерлері 246,9 мың теңге (11,3% көбейген) алады.

Саладағы жалақының одан әрі өсуі мүмкін, деп хабарлайды zakon.kz. Үкіметтің 2023 жылғы 17 тамыздағы қаулысымен мемлекеттік қызметкерлерге, мемлекеттік бюджет есебінен қаржыландырылатын ұйымдардың қызметкерлеріне және қазыналық кәсіпорын қызметкерлеріне еңбекақы төлеу жүйесіне өзгерістер енгізілді.