Сондай-ақ Ұлттық банк:
▪️ Қарыз сомасынан бірнеше есе көп қаражаттың бұғатталуына жол бермеуді;
▪️ Берешекті бір банктік шот арқылы өндіріп алуды;
▪️ Қаулы орындалғаннан кейін басқа шоттарға салынған шектеулерді алып тастауды ұсынды.

Қазір сот орындаушылары борышкердің әртүрлі банктердегі бірнеше шотына бір уақытта тыйым сала алады. Соның салдарынан бұғатталған қаражаттың жалпы сомасы қарыз көлемінен бірнеше есе асып кетуі мүмкін.

Ұлттық банк тиісті ұсыныстарды Әділет министрлігіне жолдаған. Оларды іске асыру үшін заңнамаға өзгерістер енгізу қажет.

Маңызды: бұл әзірге ұсыныс қана. Өзгерістер заң жүзінде қабылданып, күшіне енген жоқ.

Маймыл шешегі — MPXV вирусы тудыратын жұқпалы ауру. Ол көбіне науқас адаммен тығыз байланыс кезінде беріледі. Негізгі белгілері — дене қызуының көтерілуі, бас пен бұлшықеттің ауыруы, лимфа түйіндерінің ісінуі және теріде бөртпенің пайда болуы. Көп жағдайда науқастар толық сауығып кетеді.

Жергілікті биліктің мәліметінше, көшеге шамамен 550 000 адам шыққан. Парижде кешке қарай тәртіп сақшыларымен қақтығыс күшейіп, полиция көзден жас ағызатын газ бен су атқыш қолданды.

Астанада және басқа қалаларда ғимараттарға от қойылған. Соның ішінде Лимож қаласында мэриядағы ірі өрт салдарынан шатырдың бір бөлігі опырылып түсті. Бірнеше қалада дүкендер тоналып, муниципалдық мекемелер мен кәсіпорындарға зақым келтірілгені айтылды.

Премьер-министр Себастьен Лекорню тәртіпсіздік кезінде 150 полиция қызметкері жараланғанын мәлімдеді. Париждің кей бөліктерінде шерудің негізгі бөлігі күндіз бейбіт өткенмен, кешке қарай топтар көшеде от жағып, көліктерді өртеген.

Лионда қала мэрі Грегори Дусе туристік кеңсенің өртенуін «қайғылы жағдай» деп атап, бұл тарихи әрі танымал ғимарат екенін айтты. Жергілікті полиция өрт сөндірушілердің қауіпсіз жұмыс істеуіне «жау адамдар» кедергі келтіргенін хабарлады.

Францияның ішкі істер министрлігі наразылықтар кезінде Парижден бөлек Марсель, Ренн, Тулуза және Анже қалаларында да «нысаналы зорлық-зомбылық әрекеттері» болғанын мәлімдеді. Гренобль, Авиньон, По, Монпелье және Валенс қалаларында да ғимараттарға зақым келгені айтылды.

Францияда наразылық жиі өтеді, алайда бұл жолғы шерулер елдегі саяси белгісіздік күшейіп тұрған тұспен қабаттасып отыр. Президент Эммануэль Макрон келесі жылы қызметінен кетеді, ал сауалнамалар сәуірдегі президент сайлауы Марин Ле Пен мен Жан-Люк Меланшонның арасындағы бәсекеге айналуы мүмкін екенін көрсетіп отыр.

Астрахан көшесіндегі үйдің маңынан, жол жиегінен ТОЗ-25 маркалы тегіс ұңғылы мылтықтың кесілген нұсқасы, тапаншаға ұқсас зат және әртүрлі калибрдегі оқ-дәрілер табылды.

Полицияның мәліметінше, бұған қоса гранаталар, соның ішінде жарық-дыбыстық гранаталар және өзге де әлеуетті қауіп төндіретін заттар тәркіленген.

Аталған дерек бойынша сотқа дейінгі тергеу басталды. Қару мен оқ-дәрілер тиісті сараптамаға жіберілді.

Қазір полиция қарудың қайдан шыққанын, оны кім және қандай жағдайда сақтағанын, сондай-ақ осы іске қатысы бар тұлғалардың бар-жоғын анықтап жатыр.

Бұған дейін ҰҚК полициямен бірлесіп, Қазақстанның 12 өңірінде заңсыз қару айналымын тоқтатуға бағытталған жедел-іздестіру шараларын өткізгені хабарланған болатын. Нәтижесінде 56 қару, 13 граната және 314 оқ-дәрі тәркіленді.

Соңғы бір аптада украин билігі мен әскерилері дрондарға орнатылған спутниктік интернет терминалдарын пайдалану мүмкіндігі жоғалғанын айтып келеді. SpaceX қызметіндегі ақаулар туралы Украинада өткен апта соңында мәлім болды.

Зеленский сенбі күні журналистердің сұрақтарына жауап бере отырып, терминалдар жұмыс істей беретін ең жоғары жылдамдық 161 км/сағ екенін айтты. Оның сөзінше, осы межеден кейін Starlink толық өшіп, Украина әскері дроннан айырылып қалады.

Зеленский сондай-ақ мұндай шектеулер салдарынан украин әскері алғы шептегі жауынгерлерге тамақ пен су жеткізу мүмкіндігінен айырылғанын айтты. Оның сөзінше, бұл дрондармен бақылау күшейген, техника не әскери қызметші өте алмайтын аумақтар үшін өте маңызды.

Осы аптада АҚШ билігі украин әскеріне спутниктік интернет жұмысына шектеу енгізгенін бірнеше рет жоққа шығарды. 16 қазанда Дональд Трамп та журналистердің сұрағына жауап беріп, мұндай шектеулердің себебін білмейтінін айтқан болатын.

Рубио сенбі кешінде Зеленскийдің сөздеріне жауап беріп, шектеу әдейі енгізілмегенін айтты. «Бұл әдейі жасалған жоқ. Бұған біздің қатысымыз жоқ. Starlink жылдамдығын төмендету туралы ешкім ешқандай бұйрық берген жоқ. Солай болып шықты. Бірақ, менің түсінуімше, жүйе қазір қалпына келтірілді. Бәрі бұрынғы қалпына келді», — деді ол.

Рубио сонымен бірге SpaceX-тің Starshield жүйесін атады. Оның айтуынша, бұл — АҚШ армиясы пайдаланатын әскери мақсаттағы өнім, ал Украина үшін ол әзірге қолжетімді емес. «Starshield — мүлде басқа өнім. Ол америкалық армиямен жасалған келісімшарт бойынша жұмыс істейді, Украинаға қатысы жоқ», — деді ол.

Алайда бұған дейін бірқатар БАҚ Украина Starlink пен Starshield-ті де пайдаланып келеді деп жазған. Би-би-си-дің әскери шолушысы Павел Аксенов бұл екі жүйе әртүрлі спутниктерді қолданатынын, алайда ақпарат жеткізу технологиялары бір-біріне ұқсас екенін атап өтеді.

ҚР Туризм және спорт министрлігі Спортты дамыту дирекциясының баспасөз қызметінің мәліметінше, ұлттық құрама жарыс барысында жалпы үш кездесу өткізді.

Алғашқы екі ойында қазақстандық хоккейшілер Жапония құрамасына 0:4 есебімен, Қытайға 1:2 есебімен есе жіберді.

Шешуші матчта Қазақстан құрамасы Оңтүстік Кореяны 5:1 есебімен ұтып, Азия чемпионатының қола жүлдесін иеленді.

Турнирдің финалында Жапония мен Қытай құрамалары чемпион атағын сарапқа салады.

Ақпаратқа қарағанда, Кизляр шығанағындағы арал соңғы жылдары жағалауға барған сайын жақындай түскен. Су шегініп, шағын арналар кеуіп жатыр, ал арал мен жағалау арасында жаңа жер телімдері пайда болуда. Соңғы бес жылда Каспий деңгейі 1,5 метрге төмендеген.

Егер теңіз дәл осындай қарқынмен тартыла берсе, алдағы 20 жылда су деңгейі тағы 4-5 метрге төмендеуі мүмкін. Ондай жағдайда Нордовый түбегейлі құрлықтың бір бөлігіне айналып, өзге аралдар да жойылуы ықтимал.

Басылым бұрын Каспий теңізіндегі су деңгейінің төмендеуіне байланысты жаңа арал пайда болғанын жазған еді. Ол Каспийдің солтүстік бөлігінде, Святой аралынан шамамен 500 метр шығыста және Маңғыстау облысындағы Баутино ауылынан 30 шақырым жерде орналасқан.

Мамандардың айтуынша, соңғы 4-5 жылда Каспийдің солтүстік бөлігінде су деңгейінің төмендеуінен жаңа құрлық аумақтары қалыптаса бастаған. Атап айтқанда, Кулалы, Морской, Святой, Подгорный, Ушарал, Маякшыккан және Долгий аралдары маңында осындай өзгерістер байқалады. Бұл аумақта Каспий итбалықтары мекендейді.

Қала губернаторы Александр Бегловтың айтуынша, шабуыл кезінде бір адам қаза тауып, бес адам жарақат алған. Олар ауруханаларға жеткізілді. Билік мәліметінше, 12 көпқабатты үй мен екі жеке үйге де зақым келген.

Санкт-Петербург қалалық көлік комитеті Батыс жоғары жылдамдықты диаметрінің орталық бөлімі БПЛА шабуылына байланысты уақытша жабылғанын хабарлады. Қозғалыс Екатерингофка өзенінің жағалауынан Шкиперский проток көшесіне дейін екі бағытта да тоқтатылды.

Жергілікті билік қала тұрғындарын жол жағдайын мұқият бақылап, мүмкіндігінше жеке көлікпен жүруді азайтуға шақырды. Телеграм-арналар куәгерлерге сілтеме жасап, түнгі шабуыл кезінде көпірге де соққы түсуі мүмкін екенін жазды, бірақ бұл ақпарат расталған жоқ.

Ленинград облысының губернаторы Александр Дрозденконың айтуынша, өңірде дрондардан бір тұрғын үй зардап шеккен. Бір әйел мен үш бала көміртек тотығымен улану белгілерімен ауруханаға түсті. Оның дерегінше, облыс аумағында 144 БПЛА атып түсірілген.

Дрозденко сондай-ақ Гатчинадағы көпқабатты үйге дрон сынықтары түскенін, ал Новоселье елді мекенінде 55 тұрақтағы көлік бүлінгенін айтты. Бұған қоса, Янино ауданында екі трансформаторлық қосалқы станция істен шығып, шамамен 20 мың адам жарықсыз қалған.

Ресей билігі Санкт-Петербургтегі шабуыл кезінде «ВКонтакте» деректер орталығы мен Ozon логистикалық орталығы нысанаға алынғанын растады. Ozon барлық қызметкердің эвакуацияланғанын, зардап шеккендер жоқ екенін және өрт шыққанын мәлімдеді.

Мұндай жағдайда азамат өз зейнетақы активтерінің бір бөлігін немесе толық көлемін жеке басқарушы компанияға сеніп тапсыра алады. Бұл үшін белгіленген талаптар мен рәсімдер сақталуы тиіс.

Жеке басқару тетігі зейнетақы жинақтарын әртүрлі қаржы құралдарына орналастыруға мүмкіндік береді. Алайда мұндай шешім қабылдағанда тәуекел де ескеріледі, өйткені инвестициялық табыс мөлшері өзгеріп отыруы мүмкін.

Ережелердің басты мақсаты — салымшыға қаражатты басқару тәсілін таңдауға мүмкіндік беру. Сонымен бірге зейнетақы жүйесінің қауіпсіздігі мен ашықтығын сақтау көзделеді.

Бұл бастамалар БҰҰ-ның Венадағы алаңында талқыланды. 12–16 қазан аралығында өткен ЮНСИТРАЛ-дың құқық жөніндегі III жұмыс тобының 55-сессиясына Қазақстан бақылаушы ретінде қатысты.

Кездесулерге Қазақстанның Әділет министрлігі, Венадағы халықаралық ұйымдар жанындағы Қазақстанның тұрақты өкілдігі және халықаралық арбитраж жөніндегі ұлттық сарапшы қатысты.

Талқылау барысында инвестициялық дауларды шешу қағидаларын өзгертуге қатысты бірқатар мәселе қаралды. Олардың қатарында дауларды бейбіт жолмен реттеу, үшінші тараптардың арбитраж шығындарын қаржыландыруы, өтемақы мөлшерін айқындау және ұлттық құқықтық қорғау тетіктерін пайдалану тәртібі бар.

Қазақстан тарапы мемлекеттердің де, инвесторлардың да мүддесін ескеретін, неғұрлым нақты әрі түсінікті ережелердің қажет екенін айтты.

«Қазақстан делегациясы құқықтық айқындықты арттыруға және мемлекеттер мен инвесторлардың мүдделерін теңгерімді ескеруге бағытталған ұсыныстарын ұсынды. Атап айтқанда, қазақстандық тарап консультациялар, келіссөздер және медиацияның маңызын атап өтіп, бейбіт реттеуге жәрдемдесетін шаралар іс жүзінде орындалуға тиіс екенін және дауларды негізсіз созуға әкелмеуі керек екенін көрсетті», — деді ҚР СІМ.

Қазақстан өкілдері дауларды ұзақ арбитраждық процестерге жеткізбей, келіссөз бен медиация арқылы шешудің маңызын ерекше атады. Сонымен бірге мұндай рәсімдер тараптарға қосымша кедергі келтірмеуі және істі қарауды созбауы тиіс екені айтылды.

Сессияда сондай-ақ параллель даулардың алдын алу жолдары, халықаралық инвестициялық шарттарды түсіндіру және өтемақы көлемін белгілеу мәселелері талқыланды.

Астана қаласының қылмыстық істер жөніндегі ауданаралық сотының мәліметінше, айыпталушы автодилерлік ұйымның сату бөлімінде менеджер болып жұмыс істеген. Ол құжаттарды қолдан жасап, соның негізінде 8 автокөлікті 53,1 миллион теңгеге заңсыз шығарған. Аталған соманы ол кәсіпорын кассасына тапсырмаған.

Биыл қаңтарда ол Б. есімді адамға дәл сондай үш көлікті төмендетілген бағамен ұсынған. Алайда айыпталушы бұған дейін өз міндеттемелерін орындауды көздемеген. Сатып алушы оған 16,5 миллион теңге төлегенімен, көліктерін ала алмаған.

Сот айыпталушының бұл ісін алғашында иемдену ретінде емес, алаяқтық ретінде қайта саралады. Сот көліктер оның қарауына сеніп тапсырылмағанын, сақтауға жауапты болмағанын және оларды өзі сатып алуға не тапсыруға құқығы болмағанын анықтады.

Жаза тағайындау кезінде сот оның кінәсін мойындауын, кәмелетке толмаған баласының барын және бұрын сотталмағанын ескерді. Жеңілдететін мән-жайлар анықталмады.

Жалпы қылмыстар жиынтығы бойынша сот оны 6 жылға бас бостандығынан айырды. Сондай-ақ, оған коммерциялық ұйымдарда тауарлар мен қызметтерді сатуға байланысты лауазымдарды 8 жыл бойы атқаруға тыйым салынды.

Сот жәбірленушілердің азаматтық талап-арыздарын қанағаттандырды. Үкім әзірге заңды күшіне енген жоқ.

Оқиға 15 қазан, бейсенбі күні Пешавар қаласында, Хайбер-Пахтунхва провинциясының астанасында болды. Зардап шеккендер саны 50-ден асты, олардың үшеуі ауыр халде жатыр. Қаза тапқандардың арасында 12 қыз бала бар.

Мектептің шатыры сыныпта отырған оқушылардың үстіне құлап, екі қабатты басып қалған. Билік өкілдерінің айтуынша, шатыр ескі болған және құрылыс жұмыстарына байланысты артық салмақ түскен. Мектеп иесі ұсталып, тергеу басталды.

Сондай-ақ нөсер жауын да апатқа себеп болуы мүмкін екені айтылды, алайда оқиғаның нақты себебі әлі анықталып жатыр.

Құтқарушылар үйінді астында қалған барлық тірі адамды алып шыққан, іздестіру-құтқару жұмысы төрт сағатқа созылды.

Пәкістанда ғимараттардың құлауы жиі кездеседі, өйткені елде құрылыс талаптары толық сақтала бермейді. Көптеген нысан сапасыз материалдан салынып, шығынды азайту үшін қауіпсіздік ережелері еленбей жатады.

Сәби ақпанда қоқыс жәшігінен орамалға оралған күйде табылған. Тергеу барысында 20 жастағы қыздың баланы үйінде жасырын босанғаны анықталды. Іс бойынша оның жігіті де айыпталушы ретінде танылып, сот материалдарында оның нәрестені көлікпен апарып, қоқыс контейнеріне тастағаны көрсетілген.

Абай облысының қылмыстық істер жөніндегі мамандандырылған ауданаралық соты ананы Қылмыстық кодекстің 100-бабы — «Жаңа туған баланы анасының өлтіруі» бойынша кінәлі деп танып, 2 жыл бас бостандығынан айыру жазасын тағайындады. Алайда «Қазақстан Республикасының жаңа Конституциясының қабылдануына байланысты амнистия туралы» заңға сәйкес, ол жазадан босатылды. Сондай-ақ оның кіші сержант шені де алынды.

2000 жылы туған екінші сотталушы Қылмыстық кодекстің 99-бабы 3-бөлігі — «Кәмелетке толмаған адамды өлтіру» бойынша кінәлі деп танылып, ерекше қауіпсіздік жағдайындағы қылмыстық-атқару жүйесі мекемесінде өтеумен өмір бойына бас бостандығынан айыру жазасына кесілді. Одан старший лейтенант шені де алынды.

Сотта айтылғандай, екі айыпталушы да тағылған айыпты мойындамады. Дегенмен сот олардың кінәсі іс материалдарындағы дәлелдемелер жиынтығымен дәлелденді деген қорытындыға келді.

Үкім әлі заңды күшіне енген жоқ.

Зеленский «Файнэншл Таймсқа» берген сұхбатында Украина үш күн бойы шабуылдарды шектегенін, алайда Ресей сонымен бірге Украинаның энергетикалық инфрақұрылымына соққы беруді жалғастырғанын айтты. «Бітті», — деді ол.

Ресей президенті Владимир Путин Киев те сәрсенбі күні мұнай өңдеу зауыттарына соққы беруге әрекеттенді деп мәлімдеді, бірақ Украина мұны жоққа шығарды. Ресей тарапы Рязаньдағы нысандағы өртке төрт зымыран мен ондаған дронның қирандылары себеп болғанын хабарлады.

Зеленский сондай-ақ АҚШ барлау алмасуды тоқтату арқылы Киевке қысым жасағанын айтты. Кейінірек украиналық қорғаныс дереккөздері BBC-ге Starlink спутниктік қызметінің кейбір функциялары қайта іске қосылғанын хабарлады.

Украина билігі АҚШ-тан келіп түскен ескерту деректері әуе шабуылына қарсы қорғанысты тиімді ұйымдастыру үшін өте маңызды екенін айтады. Сонымен қатар Starlink байланысы соғыс барысында дрондарды басқару және әуе кеңістігін бақылау үшін қолданылады.

Брюссельде Еуропа лидерлерінің екі күндік саммиті басталған күні Зеленский НАТО бас хатшысы Марк Рюттемен кездесті. НАТО басшысы олар энергетика саласындағы атысты тоқтату мен альянс елдерінің Украинаға үздіксіз қолдауын талқылағанын айтты.

Украина билігінің мәліметінше, сәрсенбі күні ел бойынша кемінде 13 адам қаза тапқан. Шабуылдар Донецк, Херсон және Волынь аймақтарында да тіркелді, ал Кировоград облысында соғыс басталғалы бергі ең ірі соққы жасалғаны хабарланды.

Бағдарлама аясында облигациялар теңгемен, доллармен, еуромен немесе юаньмен шығарылуы мүмкін. Қор олардың айналысқа жіберілуі үшін London Stock Exchange, Hong Kong Stock Exchange, Astana International Exchange және Қазақстан қор биржасы алаңдарына өтінім берген.

Сыйақы мөлшерлемесі бекітілген немесе құбылмалы болуы ықтимал. Еуромен шығарылатын облигациялардың кірістілігі EURIBOR индексіне, ал долларлық облигациялар SOFR көрсеткішіне байлануы мүмкін.

Қор түскен қаражатты жалпы корпоративтік мақсаттарға жұмсауды жоспарлап отыр. Олардың қатарында еншілес компанияларды қаржыландыру, инвестиция мен экспортты дамытуға қолдау көрсету, сауда қаржыландыруы және қолданыстағы қарыз міндеттемелерін қайта қаржыландыру бар.

2026 жылғы маусымда «Самұрық-Қазына» Astana International Exchange алаңында 1 млрд доллар көлемінде облигация шығарған болатын. Олардың айналыс мерзімі — 1 жыл, сыйақы мөлшерлемесі — 2026 жылғы 25 маусымдағы SOFR мөлшерлемесіне (3,6%) + 0,2%.

Ал бір айдан кейін сол алаңда қор 3 млрд юань көлемінде облигация орналастырды. Бұл облигациялардың айналыс мерзімі — 5 жыл, сыйақы мөлшерлемесі — жылдық 2,09%.

Жаңа тәртіп бойынша әлеуметтік көмектің жекелеген түрлерін тағайындау кезінде үй шаруашылығының материалдық жағдайы мен әлеуметтік жүктемесі бағаланады. Министрдің айтуынша, бұл тәсіл мемлекеттік қолдауды рәсімдік негізде емес, отбасының нақты мұқтаждығына қарай беруге мүмкіндік береді.

«Отбасының мүліктік және әлеуметтік жағдайы бағаланады. Бірде-бір мұқтаж қазақстандық қолдаусыз қалмайды, бұл — әлеуметтік саясаттың негізгі қағидасы», — деді Ертаев.

Министрдің айтуынша, жаңа әдістеме 2026 жылғы 4 қазанда бекітілген. Ол екі бөліктен тұрады: материалдық әл-ауқат және отбасының әлеуметтік тұрақтылығы. 2023 жылдан бері қолданылып келген бұрынғы әдістеме 2027 жылдың 1 қаңтарынан бастап күшін жояды.

Бірінші компонент 59 көрсеткішті қамтиды. Бағалау кезінде отбасы мүшелерінің табысы мен жұмыспен қамтылуы, несиелері, мүлкі, көлігі, бизнесінің бар-жоғы, ауыл шаруашылығымен айналысуы ескеріледі.

Анализге қажетті мәліметтер мемлекеттік дерекқорлардан алынады. Азаматтарға қосымша анықтама жинап, мемлекеттік органдарға жүгінудің қажеті болмайды. Бағалау бірыңғай өлшемдер бойынша автоматты түрде жүргізіледі.

Екінші компонент отбасының әлеуметтік жүктемесіне қатысты. Оны есептегенде үй шаруашылығының құрамы, соның ішінде балалардың, қарт адамдардың және мүгедектігі бар тұлғалардың болуы назарға алынады.

Министрдің сөзінше, табыстың бірдей деңгейі әрдайым бірдей әл-ауқатты білдірмейді. Бағуындағы асырауындағы адамдары көп отбасылар әлеуметтік жүктеме ескерілген кезде төменірек баға алуы мүмкін.

Бағалау нысаны жеке алушы емес, тұтас үй шаруашылығы болады. Есептеу кезінде бір мекенжай бойынша тіркелген отбасы мүшелері, сондай-ақ қолданыстағы тәртіпке сәйкес бірге тұратын туыстар мен басқа да адамдар ескеріледі. Жалғызбасты ата-аналар мен отбасы мүшелері бөлек тұратын жағдайлар да жеке қаралады.

Жаңа әдістеме барлық әлеуметтік көмек түрлеріне бірдей қолданылмайды. Ертаевтың айтуынша, республикалық бюджеттен төленетін 36 әлеуметтік көмектің 22-сі бұрынғы тәртіппен сақталады.

Алматы қаласы Туризм басқармасының басшысы Ғалия Тоқсейітованың айтуынша, экологиялық бастама Шымбұлақ пен Ой-Қарағайды байланыстыруды көздейтін Алматы тау кластерін дамыту жұмыстарымен қатар жүзеге асырылып жатыр. Оның сөзінше, инфрақұрылымды дамыту барысында қоршаған ортаға түсетін жүктемені азайту маңызды. Алдағы уақытта ағаш отырғызу акцияларын Бутаковка және Қимасар шатқалдарында өткізу жоспарланған.

Биылғы шараға Қазақстанның Ұлттық ЮНЕСКО клубтары федерациясы да қолдау білдіріп, жалпы көшет санына қосымша 60 шырша ұсынды. Іс-шара ЮНЕСКО клубтары күніне орайластырылып, TURAQTY JOL 7.0 ұлттық экологиялық науқанының мақсаттарымен үндесті.

Ағаш отырғызу жұмыстары мамандардың бақылауымен жүргізілді. Олар қатысушыларға көшеттерді дұрыс егу тәртібін түсіндіріп, қажетті талаптардың сақталуын қадағалады. Сонымен қатар бағдарлама аясында жастардың экологиялық жобалары таныстырылып, «Шымбұлақ» базалық станциясының маңындағы білім беру алаңында шеберлік сабағы ұйымдастырылды.

Shyrshaly жобасы 2025 жылдан бері Іле-Алатауы мемлекеттік ұлттық табиғи паркінің мамандарымен бірлесіп жүзеге асырылып келеді. Бастаманың негізгі мақсаты — Кіші Алматы шатқалындағы орманды сақтау және зақымданған аумақтарды қалпына келтіруге жәрдемдесу. Әсіресе 2011 жылғы қатты дауылдан зардап шеккен жерлерге басымдық беріліп отыр.

Шымбұлақ тау-шаңғы курортының бас директоры Ринат Әбдірахмановтың айтуынша, өткен жылы жоба аясында 500 түп шырша отырғызылған. Биылғы акция сол жұмыстың жалғасы болды. Курорт басшысы Іле-Алатауы ұлттық паркінің тәлімбағында өсірілген көшеттерді алдағы уақытта да тұрақты түрде отырғызу жоспарланып отырғанын атап өтті. Сондай-ақ ол бастамаға қала тұрғындарының қызығушылығы артып келе жатқанын жеткізді.

Осылайша, биылғы акция барысында отырғызылған 560 көшет таулы аймақтың орман қорын толықтыруға бағытталған жұмыстың жалғасына айналды. Мұндай жобалар мемлекеттік органдарды, бизнес өкілдерін, экологтар мен жастарды ортақ мақсат төңірегіне біріктіріп, Іле Алатауының табиғи келбетін келер ұрпаққа сақтап қалуға ықпал етеді.

Министрлік екінші деңгейлі банктермен интеграция жүргізіп, әлеуметтік көмек тағайындау кезінде азаматтардың табысы мен шығысы туралы мәлімет алуды көздеп отыр. Вице-министр Бахтияр Жазыкпаевтың айтуынша, отбасының әрбір мүшесі жеке деректерді өңдеуге келісім беруі тиіс. Осыдан кейін ғана қаржы ұйымдары банк құпиясын ашуға құқылы болады.

«Бізде заңда мұндай норма қарастырылған: келісім берілмесе, әлеуметтік төлем уақытша тоқтатылады, кейін оның себебі анықталады. Бұл жерде министрлік өкілі мен азамат арасында диалог болады», – деді Аскарбек Ертаев СЦК-дегі брифингте.

2027 жылғы 1 қаңтардан бастап Қазақстанда бірқатар мемлекеттік жәрдемақы отбасының мұқтаждығына қарай тағайындала бастайды. Бұл шектеу А және B санатындағы алушыларға қатысты болады. Тізімге, атап айтқанда, бала тууға берілетін жәрдемақы, бір жарым жасқа дейінгі бала күтімі үшін төлем және көпбалалы отбасыларға арналған жәрдемақы енгізілген. Кейбір алушылар топтары үшін ерекшеліктер қарастырылған.

Қолданыстағы отбасының әл-ауқатын бағалау әдістемесінде А немесе B санатына автоматты түрде жатқызу үшін бірыңғай табыс шегі жоқ. Нәтиже барлық өлшемшарт бойынша жиналған жалпы балға байланысты анықталады. А санаты үшін кемінде 1800 балл жинау қажет, ал B санаты 730-дан 1799 балға дейін белгіленген.

«Еуропа өз арнасын қалыптастыру үшін бірқатар қадам жасап жатыр. Ол, сөзсіз, ең алдымен біздің мүддемізді білдіруі тиіс. Сондай-ақ біз ресейліктермен сөйлесе алатын формат табуымыз керек. Сондықтан мұның бәрі міндетті түрде болады деп ойлаймын», — деді Зеленский Антониу Кошта мен Урсула фон дер Ляйенмен өткен кездесуден кейінгі баспасөз мәслихатында.

Зеленский әлеуметтік желілерде де Еуроодақтың Украинаға көрсететін көмегін талқылағанын жазды. Оның айтуынша, әңгіме, ең алдымен, энергетика мен әуе қорғанысына қажетті қолдау туралы, сондай-ақ келесі жылға арналған қаржылық тұрақтылықты сақтау жайында болған.

Еурокомиссия төрайымы Урсула фон дер Ляйен Еуроодақ Ресей соғысты тоқтатпайынша, санкцияларды алып тастамайтынын тағы да мәлімдеді. Бұл арада Дональд Трамп әкімшілігі өткен аптада Ресей дизеліне салынған америкалық санкцияларды уақытша алып тастаған еді.

Трамп жақында өтуі тиіс аралық сайлау алдында жанармай бағасын төмендеткісі келетінін айтқан. Ол бағаның қымбаттауына Украина тарапынан Ресей мұнай өңдеу зауыттарына жасалған соққылар әсер етіп отыр деп санайды. Алайда оның сыншылары мұны жоққа шығарып, әлемдік мұнай бағасының өсуіне АҚШ-тың Иранмен соғысы себеп болғанын алға тартады.

Трамп бейсенбі күні Newsmax арнасына берген сұхбатында да осы пікірін қайталады. «Мен Зеленскийдің тоқтағанын қалаймын, Путиннің де тоқтағанын қалаймын. Егер Зеленский тағы да мұнай өңдеу зауыттарына соққы беріп жатыр десеңіз, оның нәтижесі тек әлемдік мұнай бағасының қымбаттауы ғана болады. Мен мұны масқара деп санаймын», — деді ол.

Сол сұхбатында Трамп Зеленский соғысты аяқтауға келіспей отыр деп те мәлімдеді және Украина президентіне қарағанда Владимир Путинмен жұмыс істеу өзіне жеңілірек екенін айтты. Брюссельде осы сөздерге жауап берген Зеленский: «Мен Трамппен оған қарағанда қиын ба? Ал онымен Путинге қарағанда жеңіл ме? Маған — Трамппен», — деді.

Пешавардағы Леди Рединг ауруханасының өкілі Мұхаммад Асимнің айтуынша, қаза тапқандар арасында 32 оқушы бар: 20 ұл және 12 қыз, сондай-ақ бір мұғалім әйел қайтыс болған. Бұған қоса, Пешавардағы Насирулла Хан Бабар мемориалдық ауруханасы бір баланың көз жұмғанын хабарлады.

Ғимараттан 20 оқушы шығарылған, олардың үшеуі ауыр жарақатпен ауруханада жатыр. Қаза тапқан және жараланған балалардың жасы 6 мен 12 аралығында, көбінің басынан жарақат алғаны айтылды.

Құтқарушылардың болжамынша, қираған құрылымның астында тағы да балалар болуы мүмкін. Пешавар полициясының басшысы Миан Саидтың айтуынша, мектепте 110 оқушы болған.

Оқиға Хайбер-Пахтунхва провинциясының астанасы Пешавардың солтүстігіндегі Дир-Колони ауданында орналасқан жекеменшік «Әл-Хаир білім беру орталығы» мектебінде болған. Құтқару қызметінің өкілі мектепте үшінші қабаттың үстіндегі шатыр құлап, ол екінші және үшінші қабаттың арасындағы жабынға түскенін, содан кейін екеуі бірге сыныптардағы оқушылардың үстіне опырылғанын айтты.

Апаттың нақты себебі әзірге ресми түрде анықталған жоқ. Алайда Саидтың айтуынша, ғимараттың конструкциясы әлсіз болған.

«Бұл әлсіз құрылыс. Шатыр тым ауыр болып, әлсіз конструкцияға сүйенген, соның салдарынан құлады», — деді Саид Reuters агенттігіне.

Хайбер-Пахтунхва провинциясының губернаторы Файсал Карим Кунди өңірдегі барлық мектеп ғимараттарына тексеріс жүргізуді тапсырды. Пәкістан премьер-министрі Шахбаз Шариф қаза тапқандардың отбасылары мен жараланғандарға көңіл айтты, ал президент Асиф Әли Зардаридің кеңсесі бұл қайғылы жағдайдың бүкіл елді дүр сілкіндіргенін хабарлады.