Кадрлар

Тоқаев жаңа ҰҚК төрағасы Марат Ирменовті қабылдады

Президент Қасым-Жомарт Тоқаев Марат Ирменовтен ұлттық қауіпсіздік саласындағы жұмыс пен алдағы жоспарлар туралы есеп алды. Кездесу соңында мемлекет басшысы бірқатар тапсырма берді.

Қасым-Жомарт Тоқаев 20 қарашада Ұлттық қауіпсіздік комитетінің төрағасы Марат Ирменовті қабылдады. Кездесуде ұлттық қауіпсіздікті қамтамасыз ету жөніндегі жұмыс пен ведомствоның алдағы жоспары талқыланды.

Президентке Марат Ирменов комитеттің атқарып жатқан жұмысы мен алдағы кезеңге қойылған міндеттер туралы баяндады. Сондай-ақ ұлттық қауіпсіздік органдарының қызметін реформалау және оның тиімділігін арттыру бойынша қабылданып жатқан шаралар жөнінде ақпарат берілді.

Бұл жұмыстар бұрын ҰҚК басшылығымен өткен жиынның қорытындысы бойынша берілген тапсырмаларды орындау аясында жүргізіліп жатыр.

Кездесу соңында Қасым-Жомарт Тоқаев бірқатар тапсырма берді. Алайда олардың мазмұны жария етілген жоқ.

Еске салайық, 16 қарашада Қасым-Жомарт Тоқаев Ермек Сағымбаевты Ұлттық қауіпсіздік комитетінің төрағасы қызметінен босатқан еді. Ол бұл лауазымды 2022 жылғы қаңтардан бері атқарып келген. Ал комитеттің жаңа басшысы болып бұған дейін төраға орынбасары қызметін атқарған Марат Ирменов тағайындалды.