Ақтөбе – Қандыағаш трассасының жаңа бөлігі ақылы жолға айналды
2026 жылғы 15 қарашадан бастап Ақтөбе – Қандыағаш автожолының 89 шақырымдық бөлігіне ақы төлеу енгізілді. Жеңіл көліктер үшін жолдың бір бөлігі тегін болып қалады, ал төлем мөлшері көлік түрі мен төлеу тәртібіне байланысты өзгереді.
2026 жылғы 15 қарашадан бастап республикалық маңызы бар Ақтөбе – Қандыағаш автожолының 89 шақырымдық бөлігі ақылы жүйеге енгізілді. Бұл учаске қолданыстағы Қандыағаш – Мақат ақылы трассасының құрамына қосылып, жолдың жалпы ұзындығы 469,5 шақырымға жетті.
«ҚазАвтоЖолдың» мәліметінше, 11+000 және 87+200 шақырым аралығында жол ақысын барлық көлік санаты төлейді. Ал трассаның қалған бөлігінде төлем тек автобустар мен жүк көліктеріне қолданылады. Жеңіл көліктер үшін жол жүру ақысыз сақталады.
Төлем құны көлік санатына және ақыны қалай төлейтініне байланысты есептеледі. Жеңіл автомобильдің ақылы бөліктің толық бағытымен бір бағытта жүруі алдын ала төлем жасағанда шамамен 240 теңге, ал сапардан кейін төлегенде 276 теңге болады.
Жол бойында көліктің мемлекеттік нөмірін автоматты түрде тіркеп, төлемді есептейтін 10 бақылау аркасы орнатылған. Ұлттық компания алдын ала төлем жасаудың үнемді екенін еске салады.
Ол үшін көлік балансын kaztoll.kz сайты, банк қосымшалары немесе өзге де ресми төлем сервистері арқылы алдын ала толықтыру ұсынылады. Жол бойындағы елді мекендер мен жақын аудандарда тіркелген көлік иелеріне жеңілдікпен абонемент қарастырылған.
Ұлттық компанияның хабарлауынша, жеңіл көліктерге арналған жылдық абонементтің бағасы — 1 АЕК, яғни 4325 теңге. Автобустар мен жүк көліктері үшін көлік санатына қарай айлық және жылдық абонементтер көзделген.