Атбасар колониясындағы азаптау ісі бойынша 12 бұрынғы қызметкер сотталды

Ақмола облысының Атбасар аудандық соты 2023 жылдың тамызында сотталғандарға қатысты азаптау қолданған ЕЦ 166/4 колониясының 12 бұрынғы қызметкеріне қатысты үшінші үкім шығарды. Бұл туралы Қазақстанның адам құқықтары мен заңдылықты сақтау жөніндегі халықаралық бюросы хабарлады.

Бюроның мәліметінше, сот ауырлау саналатын «Азаптау» бабын алып тастап, орнына Қылмыстық кодекстің 362-бабы 1-бөлігі — «Билікті немесе лауазымдық өкілеттікті асыра пайдалану» бабын қолданған. Барлық 12 адам кінәлі деп танылып, әрқайсысына екі жылға бас бостандығын шектеу жазасы тағайындалды.

Олардың тоғызына амнистия қолданылып, жаза мерзімі бір жылға дейін қысқартылды, ал олар кепілмен босатылды. Бюроның хабарлауынша, үш жәбірленушіге 1,5 миллион теңгеден моральдық өтемақы төленеді, тағы 17 адамға 500 мың және 800 мың теңге мөлшерінде өтемақы белгіленді.

Қызметтік тексеріс 2023 жылдың қыркүйегінде видео жарияланғаннан кейін Қылмыстық-атқару жүйесі комитетінде басталған. Түсірілімде сотталған азамат дәретхананы жуудан бас тартқаны көрінеді. Алдымен қызметкерлер оны сөзбен көндіруге тырысады, кейін кадр сыртындағы бұйрықтан соң жерге жығып, таяқпен ұрады.

2025 жылдың ақпанында алқабилер оларды ақтап шыққан. Алайда сәуірде бірінші сатыдағы сот процессуалдық бұзушылықтарға жол бергені анықталып, іс қайта қарауға жіберілген еді. Кейін, 2025 жылдың желтоқсанында да қызметкерлерді алқабилер тағы ақтап шықты.

14 қаңтарда Ақмола облысының прокуратурасы екінші ақтау үкіміне наразылық білдіріп, алқабилерді іріктеу барысында заңбұзушылықтар болғанын алға тартты. 17 наурызда Ақмола облыстық сотының сот алқасы бұл үкімді де жойып, істі басқа құрамда қайта қарауға жіберді.

6 мамырда айыпталушыларға жаңа айып тағылғаны белгілі болды. Сотта мемлекеттік айыптаушы жаңа айыптау актісін ұсынып, 12 сотталушыға Қылмыстық кодекстің 362-бабы 1-бөлігі бойынша іс қозғалғанын және істі Атбасар аудандық сотының қарауына жіберу туралы өтініш берген.