Елімізде -16 градусқа дейін қақаған аяз болады
«Қазгидромет» синоптиктері 12–14 қараша аралығына арналған ауа райы болжамын жариялады. Алдағы үш күнде еліміздің кейбір аймақтарында температура 16 градусқа дейін төмендейді
Мамандардың мәліметінше, алдағы күндері Қазақстанның басым бөлігінде ауа райы құбылмалы болады. Бірқатар өңірде жаңбыр мен қар жауады. Ал оңтүстік-шығыстың таулы аймақтарында жауын-шашын мол түсіп, кей жерлерде көктайғақ қалыптасуы мүмкін.
Сонымен қатар жекелеген күндері батыс, солтүстік және орталық өңірлерде жауын-шашынсыз ауа райы күтіледі. 13 қарашадан бастап оңтүстікте де жауын-шашын тоқтайды деген болжам бар.
Синоптиктер республика аумағында жел күшейетінін ескертті. Шығыс Қазақстанда жаяу бұрқасын соғуы мүмкін. Сондай-ақ түнгі және таңғы уақытта тұман түсу ықтималдығы бар.
Өңірлерде ауа температурасы қандай болады?
- Батыста: түнде +2…+9, күндіз +8…+17 градус жылы.
- Солтүстікте: түнде -2…-10, күндіз -2…+5 градус.
- Орталық пен шығыста: түнде -5…-15, күндіз -3…+5 градус.
- Оңтүстікте: түнде -1…-8, күндіз +5…+12 градус.
- Оңтүстік-шығыста: түнде -3…-8, таулы аймақтарда -11…-16 градус аяз. Күндіз +2…+10 градус, таулы өңірлерде -1…-6 градус болады.
Осылайша, алдағы үш тәулікте әсіресе еліміздің шығысы мен оңтүстік-шығысындағы таулы аудандарда күн айтарлықтай суытады. Синоптиктер тұрғындарға ауа райының қолайсыз құбылыстарын ескеріп, сақтық шараларын ұстануға кеңес береді.