Тибетте үйлер қирап, жарық өшті
Қытайдың Тибет автономиялық ауданында магнитудасы 7 балға жеткен жер сілкінісі болып, кемінде 16 адам қаза тапты. Тағы ондаған тұрғын жарақат алған. Табиғи апат салдарынан жүздеген ғимарат қираған. Бұл туралы Newsroom.kz хабарлайды.
Жер сілкінісі 22 қазан күні кешке Нагчу қаласының маңындағы таулы аймақта болған. АҚШ Геологиялық қызметінің мәліметінше, зілзаланың ошағы жер астында шамамен 18 шақырым тереңдікте орналасқан. Қытай мемлекеттік БАҚ-тарының хабарлауынша, өңірде кемінде 339 тұрғын үй қираған.
Табиғи апаттан кейін кейбір аудандарда электр қуаты мен байланыс жүйелері үзілген. Тау жыныстарының құлауы салдарынан жолдардың бір бөлігі жабылып, құтқару жұмыстары қиындаған. Мамандар үйінді астында қалған адамдарды іздестіріп жатыр.
Құтқару жұмыстарына жергілікті қызметтер жұмылдырылып, зардап шеккен тұрғындарға уақытша баспана мен қажетті заттар жеткізілуде. Қауіпсіздік мақсатында мыңдаған адам эвакуацияланған.
Қытай билігі апат салдарын жою және зардап шеккендерге көмек көрсету жұмыстарын күшейтті. Қираған ғимараттар мен инфрақұрылымға келтірілген залалдың көлемі әлі де нақтыланып жатыр.