Оқиға туралы мәлімет Kozachkov Offside Telegram-арнасында жарияланған. Ондағы ақпаратқа сәйкес, белгісіз адамдар үйге терезе арқылы кіріп, теңге, АҚШ доллары және еуромен сақталған ақшаны алып кеткен. Жазбада жәбірленуші ретінде Ақкөл қаласының бұрынғы әкімі аталады. Алайда полиция оның жеке басы туралы ақпаратты ресми түрде растаған жоқ.
Ақмола облысының полиция департаменті алдын ала мәлімет бойынша, ұрлық биыл 28 тамызда болғанын хабарлады. Белгісіз адамдар жергілікті тұрғынның үйіне кіріп, ірі көлемдегі ақшаны жымқырған.
Жедел-іздестіру шаралары барысында құқық қорғау органдары төрт адамның іске қатысы болуы мүмкін екенін анықтаған. Олардың екеуі ұсталып, уақытша ұстау изоляторына қамалды. Қалған күдіктілерді іздеу жұмыстары жалғасып жатыр.
Сонымен қатар полиция әлеуметтік желіде көрсетілген ұрланған ақшаның нақты сомасын да, жәбірленушінің бұрынғы әкім екені туралы ақпаратты да растаған жоқ. Ведомствоның мәліметінше, тергеуге қатысты өзге ақпарат Қазақстан Республикасы Қылмыстық-процестік кодексінің 201-бабына сәйкес жария етілмейді.
