Рэпер Navai Қазақстаннан шығарылды
Қазақстанда есірткі контрабандасына қатысы бар деген күдікпен ұсталған ресейлік рэпер Navai-ға қатысты қылмыстық іс тоқтатылды. Өнер иесі ел аумағынан шығарылды. Бұл туралы 20 қазанда Жамбыл облысы полиция департаменті хабарлады.
Құқық қорғау органдарының мәліметінше, қылмыстық істі тоқтату туралы шешім ақтамайтын негіздер бойынша қабылданған. Бұған құқық бұзушылықтың алғаш рет жасалуы және рэпердің жасаған әрекетіне шын өкінуі ескерілген. Процестік шешімді қадағалаушы орган мақұлдаған.
Шын есімі Навай Бакиров болатын музыкант 2026 жылғы 13 қазанда Қазақстанға кіреберістегі «Қордай» шекара бекетінде ұсталған. Операцияны полиция қызметкерлері Ұлттық қауіпсіздік комитетінің Шекара қызметімен бірлесіп жүргізген.
Көлікті тексеру кезінде құқық қорғау органдары есірткі затының анықталып, тәркіленгенін хабарлаған. Осы оқиғадан кейін есірткі контрабандасы және оны заңсыз сақтау деректері бойынша тергеу басталған.
15 қазанда Қордай аудандық соты рэперді екі ай мерзімге қамауда ұстауға санкция бергені белгілі болды.
Алайда 20 қазанда полиция қылмыстық істің тоқтатылғанын мәлімдеді. Қабылданған процестік шешімнен кейін Navai Қазақстан аумағынан шығарылды.