Қазақстан әйелдер құрамасы Азия чемпионатында қола жүлде алды
Шайбалы хоккейден Қазақстан әйелдер құрамасы Жапонияның Саппоро қаласында өткен Азия чемпионатында үшінші орынға ие болды. Команда шешуші ойында Оңтүстік Кореяны 5:1 есебімен жеңді.
Қазақстанның әйелдер құрамасы шайбалы хоккейден Жапонияның Саппоро қаласында 15–18 қазан күндері өткен Азия чемпионатында қола жүлдеге қол жеткізді.
ҚР Туризм және спорт министрлігі Спортты дамыту дирекциясының баспасөз қызметінің мәліметінше, ұлттық құрама жарыс барысында жалпы үш кездесу өткізді.
Алғашқы екі ойында қазақстандық хоккейшілер Жапония құрамасына 0:4 есебімен, Қытайға 1:2 есебімен есе жіберді.
Шешуші матчта Қазақстан құрамасы Оңтүстік Кореяны 5:1 есебімен ұтып, Азия чемпионатының қола жүлдесін иеленді.
Турнирдің финалында Жапония мен Қытай құрамалары чемпион атағын сарапқа салады.