Қазақстанда ересектердің 56%-ы артық салмақтан зардап шегеді
Қазақстанда ересектердің 56%-ы артық салмақпен өмір сүреді, ал 20%-ына семіздік диагнозы қойылған. Мамандар бұл мәселені дәрігер бақылауымен кешенді емдеу қажеттігін айтып отыр. Бұл туралы Newsroom.kz хабарлайды.
2026 жылғы 9 қазанда Астанада өткен баспасөз мәслихатында Денсаулық сақтау министрлігінің, медицина саласы мен фармацевтика өнеркәсібінің өкілдері артық салмақ пен семіздікті емдеудің заманауи тәсілдерін талқылады.
Мамандардың айтуынша, семіздік тек сыртқы келбетке қатысты мәселе емес. Ол 2 типті қант диабетінің, жүрек-қан тамырлары ауруларының және тірек-қимыл аппараты бұзылыстарының даму қаупін арттырады.
Obesity Atlas-тың 2025 жылғы деректеріне сәйкес, Қазақстандағы ересектердің 56%-ы артық салмақпен өмір сүрсе, 20%-ында клиникалық деңгейдегі семіздік бар. Көп жағдайда адамдар дәрігерге денсаулығында басқа да асқынулар пайда болғаннан кейін ғана жүгінеді.
Диабет, эндокриндік және метаболизмдік аурулар қауымдастығының президенті Айгүл Дұрманованың сөзінше, салмақ тастау емдеудің алғашқы кезеңі ғана. Одан кейін қол жеткізілген нәтижені сақтау маңызды.
Ол үшін дәрігердің бақылауымен тамақтану тәртібін, дене белсенділігін және пациенттің жалпы денсаулық жағдайын қадағалау қажет. Сонымен қатар мамандар тек таразыдағы көрсеткішке сүйенбей, май тінінің мөлшерін, оның ағзада таралуын, зертханалық талдау нәтижелерін және қосымша диагноздарды да ескереді.
Баспасөз мәслихатында Ұлттық қоғамдық денсаулық сақтау орталығы басқарма төрағасының орынбасары Жанар Қалмақова метаболизмдік асқынулардың алдын алу бағытындағы кешенді шаралар туралы айтты. Оның ішінде алғашқы медициналық-санитариялық көмек ұйымдарының рөліне ерекше мән берілді. Емханаларда зат алмасу бұзылыстарын ерте анықтау аурудың асқыну қаупін төмендетуге мүмкіндік береді.
Сондай-ақ жиында семіздікті емдеуге арналған дәрілік терапия мәселесі көтерілді. Novo Kazakhstan компаниясының бас директоры Манвендра Сингхтің мәлімдеуінше, Қазақстанда артық салмақты бақылауға арналған Wegovy®️ препараты тіркелген.
Компания өкілдерінің айтуынша, препараттың тиімділігі мен қауіпсіздігі STEP клиникалық зерттеулері және SELECT жүрек-қан тамырлары зерттеуі аясында бағаланған. Препараттың қолданылуы мен емдеу тәсілін таңдауды дәрігер пациенттің жеке жағдайына қарай шешеді.
Мамандар семіздікпен күресуде бір ғана әдіске сүйену жеткіліксіз екенін атап өтті. Тиімді нәтиже үшін профилактика, дұрыс тамақтану, дене белсенділігі, медициналық бақылау және қажет болған жағдайда дәлелді дәрілік терапия қатар қолданылуы керек.