Көкшетауда мектеп маңында бала көліктен құлап кетті
Көкшетауда мектеп маңында көлік қозғалып бара жатқан кезде бала есікті ашып, жолға құлап кеткен. Оқиға 5 қазан күні таңертең болған. Бұл туралы Ақмола облысының Полиция департаментіне сілтеме жасап, Newsroom.kz хабарлайды.
Полицияның мәліметінше, Subaru Forester көлігінің жүргізушісі баланы мектеп маңында рұқсат етілмеген жерде түсірмек болған. Көлік әлі толық тоқтамай тұрып, бала есікті ашып, жолға құлаған.
Тексеру барысында көлікте баланы тасымалдауға арналған арнайы ұстап тұратын құрылғы және қауіпсіздік белдігіне арналған адаптер болмағаны анықталды.
Жүргізуші әкімшілік жауапкершілікке тартылып, онымен профилактикалық әңгіме жүргізілді.
Полиция балаларды көлікте тасымалдау кезінде қауіпсіздік талаптарын сақтаудың маңыздылығын еске салды.