Оның айтуынша, інісі Айнабек бұған дейін Қазақстанда Ұлттық ұлан қатарында әскери борышын өтеген. Кейін Ресейге күзетші болып жұмыс істеуге барған.
Алайда бірнеше күннен соң ол әпкесіне Луганск маңында екенін айтып, көмек сұраған.
«2-3 күнде алып кетпесеңіздер, соғысқа аттандыру басталып кетті», – деп жазғаны айтылды.
Сымбат Еркінбектің сөзінше, оның інісімен бірге тағы шамамен 10 қазақстандық бар. Олардың барлығы Ресейге күзетші болып жұмыс істеуге шақырылған. Алайда кейін оларға қысым көрсетіліп, құжаттарға қол қойғызылған және соғысқа жіберуге дайындалып жатқан болуы мүмкін.
Оқиғаға байланысты Қазақстанның Сыртқы істер министрлігі Ресей тарапына дипломатиялық нота жолдаған.
«Тиісті жұмыс жалғасып жатыр. Нәтижесі туралы қосымша хабарлаймыз», – деп мәлімдеді ведомство.
Қазіргі таңда азаматтардың нақты қай жерде екені және олардың құқықтық мәртебесі туралы толық ақпарат жоқ.
