Чекте ЖСН көрсетуге қатысты жаңа ереже
2026 жылғы қыркүйектен бастап Қазақстанда кассалық чектерде жеке сәйкестендіру нөмірін (ЖСН) көрсетуге қатысты талаптар өзгерді. Ереже көрсетілетін тауар немесе қызмет түріне байланысты. Бұл туралы Newsroom.kz хабарлайды.
Медициналық қызметте ЖСН көрсетіледі
Ақылы медициналық қызмет көрсетілген кезде пациенттің ЖСН-і кассалық чекте көрсетілуі тиіс.
Ал дәріханадан дәрі-дәрмек сатып алған кезде бұл талап сатып алушыға қолданылмайды.
Дүкендерде ЖСН көрсету міндетті емес
Қарапайым дүкендерде сатып алушының ЖСН-ін чекке енгізу оның талабы бойынша жүзеге асырылады. Яғни сатып алушы өз нөмірін хабарлаудан бас тарта алады.
Бұл жағдайда сатушы тауар үшін кассалық чек беруге міндетті.
Чектегі мәліметтер не үшін қажет?
Кассалық чектерде сатып алынған тауарлар, жұмыстар мен көрсетілген қызметтер туралы ақпарат сақталады. Бұл мәліметтер салықтық әкімшілендіру кезінде, соның ішінде азаматтардың кірістері мен шығыстарын салыстыру мақсатында пайдаланылуы мүмкін.
Сонымен қатар кассалық чекте тауардың немесе қызметтің атауы және Ұлттық тауарлар каталогына сәйкес сәйкестендіру коды сияқты басқа да міндетті реквизиттер көрсетіледі.
Егер сатып алушы ЖСН-ін чекке енгізуге келіссе, нөмірдің дұрыс көрсетілгенін тексерген жөн.