Қазақстанда екі айда 201 сыбайлас жемқорлық қылмысы тіркелді
Қазақстанда 2026 жылдың шілде-тамыз айларында 201 сыбайлас жемқорлық қылмысы тіркелді. Аяқталған қылмыстық істер бойынша келтірілген залал көлемі 3,7 млрд теңгені құрады. Бұл туралы Newsroom.kz хабарлайды.
Ұлттық қауіпсіздік комитетінің мәліметінше, анықталған қылмыстардың басым бөлігі жымқыру, пара алу, алаяқтық, қызметтік өкілеттіктерді теріс пайдалану және асыра пайдалану фактілеріне қатысты.
Екі ай ішінде қылмыстық істер бойынша 140 адам күдікті деп танылды.
Сонымен қатар ҰҚК 126 қылмыстық істі тергеуді аяқтаған. Оның ішінде 110 іс сотқа жолданды.
Аяқталған қылмыстық істер бойынша белгіленген залалдың жалпы сомасы 3,7 млрд теңге болды.
ҰҚК сыбайлас жемқорлық қылмыстарын анықтау және жолын кесу бағытындағы жұмыстар жалғасып жатқанын атап өтті.